பொங்கலோ பொங்கல்! பொங்கலோ பொங்கல்! பொங்கலோ பொங்கல்!

நிவேதனத்துக்குக்  கரும்பு வாங்கினோம். ஆனால் நாங்க சாப்பிடறதில்லை.  சின்ன வயசிலேயே எனக்குக் கரும்பின் மேல் விருப்பம் இருந்ததில்லை.  யாருக்கானும் தான் கொடுப்போம்.  இன்னிக்கே குடியிருப்பு வளாகத்தின் பொது வேலை செய்யும் பெண்மணி கரும்புக்கு வந்து விட்டார்.  நாளை கனுப்பொடிக்கு வேண்டும் என்பதால் நாளை தரேன்னு சொல்லி இருக்கேன்.

மஞ்சள் கொத்து, இஞ்சிக் கொத்து. இவற்றையும்  பூஜையில் வைப்பது உண்டு. கிழக்கே இருக்கும் பால்கனியில் வெயிலும் வந்தது.  பல நாட்கள் கழித்து வந்ததால் சூரியன் கொஞ்சம் கடுமையாகவே இருந்தான். :)

சூரியக் கோலத்தில் பூக்களால் அர்ச்சனை செய்திருக்கிறது.  இந்தத் தரைக்குக் கோலம் பளிச்செனத் தெரியவில்லை. பக்கத்தில் ஒரு தட்டில் அரிசி, வெல்லம், தேங்காய், வெற்றிலை, பாக்கு, பழம், வெண்கலப்பானையில் சர்க்கரைப் பொங்கல், மஞ்சள் கொத்து நீளமாக இருக்கிறது. இன்னொரு சின்ன வெண்கலப் பானையில் அவிஸ் எனப்படும் பாலன்னம், பாத்திரத்தில் சாதம், பருப்பு, வடை, காய்கள்  தட்டில்.  முன்னெல்லாம் ஒரு கிலோ காய்கள் வாங்கிக் கொண்டிருந்தோம். பின்னர் அரைகிலோ வாங்கி அதுவும் மிஞ்சிப் போகவே கால் கிலோ வாங்கினோம்.  இப்போது கால் கிலோ வாங்கி  பொங்கலுக்கு எடுத்தது போக அதையே இன்னொரு நாளுக்குனு  வைச்சுக்கறோம். :))))

சர்க்கரைப் பொங்கல் மதுரைப்பக்கம் எல்லாம் பாலிலேயே கரைய விடுவோம்.  இதுவும் அப்படிச் செய்தது தான். அரிசி 100 கிராம் தான். பருப்பு ஒரு கரண்டி, பால் அரைலிட்டரிலிருந்து முக்கால் லிட்டர் வரை அவரவர் விருப்பம் போல். வெல்லமும் அவரவர் ருசிக்கு ஏற்ப. மு.ப. தி.ப. தேங்காய்க் கீற்று நெய்யில் வறுத்துப் போட்டு ஏலப் பொடி தூவணும்.  சூடான பொங்கல் ரெடி!