குற்றம் 23

"குற்றம் 23" என்னும் படத்தைத் தற்செயலாகப் பார்க்க நேரிட்டது. நல்லவேளையா படம் ஆரம்பிச்சுக் கொஞ்ச நிமிடங்களிலேயே பார்க்க உட்கார்ந்துட்டேன். தொடர்ந்து (நான் மட்டும்) பார்த்து முடிச்சேன்.

 

நல்ல அருமையான கருத்துள்ள திரைக்கதை. நடிகர்களில் விஜய்குமாரைத் தவிர மத்தவங்களைத் தெரியலையேனு நினைச்சால் உதவி கமிஷனர் "வெற்றி மாறன்" பாத்திரத்தில் நடிச்சிருப்பது விஜய்குமாரின் மகன் அருண் விஜய் என்று பையர் சொன்னார். அபாரமான நடிப்பு! அடக்கமான நடிப்பு! வெகு இயல்பாக உதவிக் கமிஷனராக வாழ்ந்தே காட்டி இருக்கார்னு சொல்லலாம். கதை குழந்தை இல்லாத் தம்பதிகளை வைத்து அமைக்கப்பட்டிருந்தாலும் இதை ஓர் திகில் படமாகவே எடுத்திருக்கிறார்கள். கடைசி வரை விறுவிறுப்பாகவும் இருக்கிறது. கடைசியில் கிளைமாக்ஸில் சண்டைக்காட்சி தேவை இல்லை என்பதோடு அது கதைக்குப் பொருந்தவும் இல்லை என்பது என் கருத்து.

ஒரு சர்ச்சின் பாதிரியார் கொலை வழக்கில் ஆரம்பிக்கிறது கதை! அதைப் பற்றி ஓர் போலீஸ் அதிகாரி விசாரணை நடத்துகையில் பிரபல தொழிலதிபரின் மனைவியைக் காணோம்னு போலீஸுக்குப் புகார் வருகிறது. அதைக் குறித்து விசாரிக்கப் போன உதவிக்கமிஷனர் வெற்றி மாறன் பாதிரியார் கொலைக்கும், தொழிலதிபர் மனைவி இறந்ததுக்கும் ஏதோ தொடர்பு இருக்கணும்னு கண்டு பிடிக்கிறார்.  ஆகவே இரண்டு வழக்குகளையும் அவரே விசாரிக்கட்டும் என மேலதிகாரி (விஜயகுமார்) உத்தரவிட அதைத் துப்புத் துலக்கும் வெற்றி மாறனுக்குக் கிடைக்கும் தகவல்கள் அதிர்ச்சி மேல் அதிர்ச்சியாக வருகிறது. தொழிலதிபரின் மனைவி கர்ப்பமாக இருந்திருக்கிறார். கடைசியில் அவர் பிணம் குப்பைக்கிடங்கில் இருந்து கண்டெடுக்கப்படுகிறது.

குழந்தை இல்லாத் தம்பதிகளுக்குச் செயற்கை முறை கருத்தரிப்புச் செய்யும் ஓர் மருத்துவமனை கணவன் ராமகிருஷ்ணன் என்னும் மருத்துவராலும் அவர் மனைவி துளசி என்னும் மருத்துவராலும் நடத்தப்படுகிறது. அந்த மருத்துவமனை நகரிலுள்ள மற்ற மருத்துவமனைகளில் வந்து சிகிச்சை எடுத்துக் கொள்ளும் குழந்தை இல்லாத் தம்பதிகள் பற்றிய தகவல்களைத் திரட்டுகிறது. இதை எல்லாம் பயன்படுத்திக் கொள்ளும் வில்லன் (வம்சி கிருஷ்ணாவாமே, யாருங்க அது புதுசா) அந்தக் குறிப்பிட்ட மருத்துவமனையில் செய்யும் ஓர் செயலால் பாதிக்கப்பட்ட பெண்கள் ஒவ்வொருவராக இறக்கின்றனர். கடைசியில் அங்கே சுத்தி இங்கே சுத்தி நம்ம உதவி கமிஷனரோட அண்ணியும் தூக்குப் போட்டுக் கொள்கிறார். அவர் அண்ணியும் அந்தச் சமயம் மூன்று மாதம் கர்ப்பம்.  இன்னொரு இடத்தில் ஓர் அரசியல் தலைவரின் மருமகளும் கர்ப்பம் தரித்து வளைகாப்புப் போடும்போது கழிவறையில் தற்கொலை செய்து கொள்கிறாள். இந்த மூன்று கொலைக்கும் தொடர்பு இருக்க வேண்டும் என்று வெற்றி மாறனுக்குத் தோன்றுகிறது.



வெற்றிமாறன் முதல் முதல் சர்ச்சில் நடந்த கொலையை விசாரிக்கப் போன இடத்தில் தென்றல் என்னும் குழந்தைகள் காப்பகத்தில் வேலை செய்யும் பெண் இருந்ததால் அவளைச் சந்திக்கச் செல்லும் உதவிக் கமிஷனர் வெற்றிமாறன் நாளாவட்டத்தில் தென்றலைக் காதலிக்கத் தொடங்குகிறார். இது வீட்டுக்கும் தெரிய வருவதால் வெற்றிமாறனின் அண்ணியோடும் தென்றல் (மஹிமாவாம் நடிகை பெயர்) பழகத் தொடங்க, திடீர்னு அண்ணி இறந்ததைப் பற்றி வருந்தும் வெற்றிமாறனிடம் தென்றல் தன் தோழி மூலம் ஓர் உண்மை தெரிந்ததாகச் சொல்கிறார். என்னவென்று கேட்கும் வெற்றிமாறனிடம் அவர் அண்ணனுக்குக் குழந்தை பெற்றுக்கொள்ளும் தகுதி இல்லை என்றும் அவர் அண்ணி வயிற்றில் வளர்ந்து வந்தது அவர் அண்ணாவின் குழந்தை இல்லை என்றும் அண்ணிக்கு வேறு ஏதேனும் தொடர்பு இருக்குமா என்று சந்தேகப்படுவதாகவும் சொல்கிறார். கோபம் கொண்ட வெற்றிமாறன் தென்றலை அடித்து விடுகிறார். ஆனால் இந்த நூலைப் பிடித்துக் கொண்டு செல்லும் அவருக்குக் கிடைப்பன அதிர்ச்சியான தகவல்கள்.

மருத்துவமனையில் குழந்தை இல்லாத் தம்பதிகளின் பலவீனத்தை எப்படிப் பயன்படுத்திக் கொண்டு அதை வியாபாரம் ஆக்கிக் காசு சம்பாதிக்கிறார்கள் என்று தெள்ளத் தெளிவாகச் சொல்லப்பட்டிருக்கிறது. குழந்தை பிறக்கவில்லை என்றால் ஓர் தம்பதிகளை இந்த சமூகம்  இப்போதும் நடத்தும் முறையும் அதைத் தீர்க்க வேண்டி கோயில் கோயிலாகவும் ஒவ்வொரு மருத்துவமனை வாசலிலும் ஏறி இறங்கும் தம்பதிகள் பலரையும் குறித்தே இந்தக் கதை அமைப்பு! இவற்றை எல்லாம் அருமையான வசனங்கள் மூலம் எடுத்துச் சொல்லி இருக்கிறார் கதாசிரியர் அல்லது இயக்குநர் அறிவழகன்!  இயக்குநருக்குப் பாராட்டுகளைச் சொல்லும் கையோடு பாதிரியார் இறந்து போனதாகச் சொல்லப்பட்ட சர்ச்சைப் படமாக்கி இருப்பதற்கு ஒளிப்பதிவாளருக்கும் பாராட்டுகள்.

சண்டைக்காட்சியெல்லாம் வெகு இயல்பாக இருக்கின்றன. அதிலும் போக்குவரத்து நெரிசலில் சின்னத்திரைக் கதாநாயகியாக வரும் நீலிமா ராணியையும் அவர் கணவராக நடிப்பவரையும் துரத்தும் காட்சி, அவர்கள் காரில் வில்லனின் ஆள் ஏறிக் கொண்டு பணத்தை எடுத்துச் செல்வது, அவர்களைத் துரத்தியும் பிடிக்க முடியாமல் போவது எல்லாம் மிக அழகாக உயிரோட்டத்துடன் எடுக்கப்பட்டுள்ளது.  தர்க்கரீதியாக வில்லன் இந்த அடுத்தடுத்த மரணங்களுக்குச் சொல்லும் காரணம் அவ்வளவு அழுத்தமாக இல்லை.  அவன் ஒரு சைகோ என்பதை ஆரம்பத்திலே காட்டவில்லை என்பது படத்தின் வெற்றி என்று சொல்லலாம்.  ஏனெனில் மரணங்களின் காரணம் தெரிந்த பின்னரே வில்லன் படத்தில் நுழைகிறார். அதுவே ஒரு புதுமை!

அருண் விஜய் நடிச்ச எந்தப்படமும் நான் பார்த்ததில்லை என்றே நினைக்கிறேன். இது தான் முதல் படம். ஒரு போலீஸ் அதிகாரிக்குள்ள மிடுக்கு, உடல்கட்டு, நடிப்பு என்றே தோன்றாதவண்ணம் இயல்பாகச் செய்திருப்பது எல்லாம் சேர்ந்து இது அருண் விஜய்க்கு ஓர் வெற்றிப்படம் என்றே தோன்றுகிறது. தென்றலாக வரும் மஹிமா நடிச்சும் எந்தப் படமும் பார்த்ததில்லை. அவரும் வெகு இயல்பாகவே நடித்திருக்கிறார்.  மற்றபடி உறுத்தாத பின்னணி இசை! பாடல்கள் அதிகம் இல்லை. மரத்தைச் சுற்றி வெள்ளைத் தேவதைகளுடன் ஓடியாடும் காதல் காட்சிகள் இல்லை. நேரிடையாகக் கிட்டே இருந்து சம்பவங்களைப் பார்க்கிறாப் போன்ற உணர்வு. அதோடு குற்றம் 23 என்பதும் கதையின் முக்கியக் கருவைச் சுட்டுகிறது.  23 குழந்தைப்பேறில் முக்கிய அங்கம் வகிக்கிறது.  23+23 முக்கியமானது. ஆகவே நன்கு யோசித்துச் சிறிதும் தவறில்லாமல் அருமையாகக் கதையைத் தயாரித்ததோடு  மட்டுமில்லாமல் படத்தையும் எடுத்திருக்கும் குழுவினருக்கு மனமார்ந்த பாராட்டுகள்.