விதை விநாயகர்!

என்னடா, பிள்ளையார் சதுர்த்தி முடிஞ்சு இத்தனை நாட்கள் ஆகிவிட்டனவே, இப்போப் போய் விதை விநாயகர் பற்றிச் சொல்றாளேனு பார்க்கிறீங்களா? அதற்குக் காரணம் 2 நாட்கள் முன்னர் முகநூலில் பார்த்த ஆதி வெங்கட்டின் பழைய நினைவுகளின் மீள் பதிவு. அதில் அவர் தான் விதை விநாயகர் வாங்கித் தொட்டியில் கரைத்ததாகச் சொல்லி இதன் மூலம் சுற்றுப்புறச் சூழல் பாதிக்காது என்றும் சொல்லி இருந்தார்.  அங்கேயே அவரிடம் சொல்லி இருக்கலாம். ஆனால் அனைவருக்கும் தெரியணுமே! முக்கியமாய்க் கல்யாணி சங்கர் போன்ற சில பெரியவர்களும் இந்த மாதிரியான ஓர் விஷயத்தைப் பெருமையாகக் கருதுகின்றனர். விநாயகரைக் கரைப்பதன் தத்துவமோ உண்மையான நோக்கமோ இல்லாமல் இம்மாதிரிச் செய்வது சரியில்லை என்பதே என் எண்ணம்.  இப்போது இம்மாதிரியான விநாயகர் சிலைகளை அதிக விலைக்கு விற்கவும் வியாபாரத்தைப் பெருக்கவும் விநாயகர் சிலைகள் செய்பவர்கள் கண்டு பிடித்த ஓர் தந்திரமான யுக்தி எனலாம்.

விநாயகரை ஏன் நதி, குளங்களில் கரைக்கிறோம்? இதை முதலில் தெரிந்து கொண்டு பின்னர் ஏன் விதை விநாயகரைத் தொட்டிகளில் கரைக்கக் கூடாது என்று பார்ப்போமா? நம் நாட்டில் தென்மேற்குப் பருவ மழை தான் எல்லா ஆறு, நதிகளிலும், ஏரிகள், குளங்களிலும் நீரைக் கொண்டு வரும் சக்தி உள்ளது. இந்தப் பருவம் தான் நம் நாட்டின் உணவு உற்பத்தியையும் நிர்ணயிக்கிறது. இந்த மழை பெய்து கொண்டிருக்கையில் அநேகமாக எல்லா ஆறுகளும் பூரணப் பிரவாகம் எடுத்து ஓடும். அதி வேகமாகவும் ஓடும். அப்போது நதி நீரின் ஓட்டத்தில் ஆற்றில் உள்ள மணலும் அடித்துக் கொண்டு சென்றுவிடும். நீர் ஆற்றில் தங்காமல் ஓடோடி விடும் சாத்தியங்கள் உண்டு. பெய்யும் மழையால் வந்த நீரெல்லாம் தங்காமல் ஓடிக் கடலை அடைந்து விட்டால் நிலத்தடி நீர் ஆற்றைச் சுற்றி உள்ள ஊர்களிலும், அதன் மூலம் மற்றக் குளங்கள், ஏரிக்கரைகள் உள்ள ஊர்களிலும் குறைய ஆரம்பிக்கும்.


நீர் ஆற்றிலோ குளங்களிலோ ஏரிகளிலோ தங்க வேண்டுமெனில் அடியில் நீரைத் தேக்கி நிற்கும் சக்தி வாய்ந்த ஒரு பொருள் தேவைப்படும். அது தான் களிமண்! இந்தக் களிமண் ஆற்று நீர் முழுதும் ஓடாமல் தடுக்கும் சக்தி வாய்ந்தது. நன்றாக யோசித்துப் பாருங்கள். ஒவ்வொரு வருஷமும் ஆடி மாதம் அல்லது ஆவணி மாதங்களிலேயே பெரும்பாலான பண்டிகைகள் வருகின்றன. நீர் வளம் மட்டும் காரணமில்லை. நீரைச் சேமித்து வைக்கவுமே இத்தகைய பண்டிகைகள். அதிலும் விநாயக சதுர்த்தி அன்று களிமண்ணால் செய்யப்பட்ட விநாயகரை வணங்கிய பின்னர் ஒவ்வொரு வீட்டிலும் அவற்றை ஆற்றிலோ, குளங்களிலோ, ஏரிகளிலோ அல்லது வீட்டுக் கிணறுகளிலோ கரைத்தால் தான் நீர் தேங்கி நின்று நிலத்தடி நீர் மட்டம் உயரும். ஒவ்வொரு ஊரிலும் விநாயகரை வணங்கிய ஒவ்வொரு குடும்பத்தினரும் இம்மாதிரிச் செய்தால் அதன் மூலம் அந்த அந்தச் சுற்று வட்டாரங்களில் உள்ள ஆறுகள், ஏரிகள், குளங்களின் நிலத்தடி நீர் மட்டம் உயர வழி கிடைக்கும்.


ஒவ்வொரு வீட்டிலும் இப்படிக் களிமண்ணால் ஆன விநாயகர் சிலைகளைக் கரைப்பதன் மூலம் நீர் பூமிக்குள் உறிஞ்சப்படும். அதுவும் பிள்ளையார் சதுர்த்தி அன்றே கரைப்பதில்லை என்பதையும் கவனியுங்கள். மூன்றாம் நாள் தான் கரைப்போம். அதற்குள் களிமண் காய்ந்திருக்கும் அல்லவா? காய்ந்த களிமண் நீரில் அடித்துச் செல்ல முடியாது. அங்கேயே தங்கும். விநாயகரைக் கரைக்கையில் மண் அங்கேயே நிலத்தில் படியும். ஆனால் இது களிமண்ணால் செய்யப்பட்ட விநாயகர் சிலைகளுக்கு மட்டுமே பொருந்தும். இப்போதைய ப்ளாஸ்டர் ஆஃப் பாரிஸ் சிலைகளுக்கோ மற்றச் செயற்கைச் சாயம் பூசப்பட்ட விநாயகர் சிலைகளுக்கோ சற்றும் பொருந்தாது.

மக்களின் எதிர்காலத்துக்காகப்பயன்படுத்தப்பட்ட ஒரு திட்டம் இப்போது முற்றிலும் சிதைந்து போய்விட்டது. இதைச் சாக்காக வைத்துக் கொண்டு தான் விதை விநாயகரைக் கொண்டு வந்திருக்கிறார்களோ எனத் தோன்றுகிறது. களிமண்ணில் செய்யப்பட்ட விநாயகர் சிலைக்குள்ளாகப் பிள்ளையார் அச்சில் வார்க்கும் முன்னர் அவற்றில் பூச்செடிகளின் விதைகளையோ அல்லது காய்கறிகளின் விதைகளையோ போட்டு விட்டு விதை விநாயகர் என்னும் பெயரில் விற்பதோடு அல்லாமல் சுற்றுப்புறச் சூழலுக்கும் நல்லது என்கின்றனர். அந்தப் பிள்ளையாரைச் செடிகள் வைக்கும் தொட்டியில் கரைக்கச் சொல்கிறார்கள். அதன் மூலம் விதைகள் தொட்டியில் விழுந்து முளைக்கும் என்பதோடு பிள்ளையாரை வைத்து வணங்கியதிலும் ஓர் அர்த்தம் இருக்கும் என்பதே அவர்கள் சொல்வது.

தொட்டியில் விநாயகரைக் கரைத்து அதன் உள்ளே இருக்கும் விதைகளை நட்டால் தான் நன்மை தருமா? நேரடியாகவே தொட்டிகளில் விதைகளைப் போட்டு வளர்க்கலாமே! பிள்ளையாரைக் கரைத்து அதன் மூலம்  விதைகளைப் போட்டு முளைக்க வைக்கும் இது சாஸ்திர விரோதம் என்றால் ஏற்கக் கூடியவர்கள் யாரும் இல்லை. விநாயகரைக் கரைப்பதன் உள்ளார்ந்த பொருளே இங்கே அடிபட்டுப் போகிறது. மேலும் விநாயகரை விஸர்ஜனம் செய்வது என்றே சொல்லுகிறோம். இந்த விஸர்ஜனம் என்னும் சொல்லுக்கு முற்றிலும் கரைத்துவிடுவது என்றே பொருள். அதைப் பார்த்தால் முற்றிலும் கரைக்கப்பட்ட விநாயகர் சிலையிலிருந்து விதைகளைப் போட்டு மீண்டும் முளைக்க வைப்போம் என்பது சற்றும் பொருந்தாத ஒன்று. விஸர்ஜனம் செய்தாகி விட்டது எனில் அங்கே அப்புறாமா ஏதும் மிச்சம் இல்லை என்பதே உண்மையான பொருள். முற்றிலும் கரைக்கப்பட்ட விநாயகர் சிலையில் இருந்து செடிகள் முளைப்பது என்பது சாஸ்திர விரோதம் மட்டுமில்லாமல் விநாயகர் வழிபாட்டின் அர்த்தமே இல்லாமல் போய்விடும்.