மதுரைக்குப் போகாதேடி! அந்த மல்லிப்பூ கண்ணு வைக்கும்?

மதுரைக்குச் சென்று இரண்டு நாட்கள் தங்கி மீனாக்ஷியை முடிஞ்சபோது பார்த்துட்டு அப்படியே திருப்பரங்குன்றம், அழகர்கோயில், திருவேடகம், திருமோகூர், ஆனைமலை யோகநரசிம்மர் ஆகியோரையும் பார்க்கணும்னு எண்ணம். திருவாதவூரும் அந்த வழியில் தான் இருக்கு என்றாலும் இப்போ அது பட்டியலில் சேர்க்கலை.அதிலும் டிசம்பரில் மீனாக்ஷியைப் பார்க்காமல் திரும்பி வந்ததில் இருந்து மனசிலே ஒரே வேதனை.  மீனாக்ஷியைப் பார்க்கணும்னு ஆவல்.

ஆகவே  இந்த மாசம் போகலாம்னு முடிவெடுத்தோம்.  தங்குவதற்கான ஹோட்டல்களை இணையத்தில் அலசிப் பார்த்து தானப்ப முதலித் தெருவில் ஹோட்டல் கதிர் பாலஸைத் தேர்ந்தெடுத்தேன்.  நல்ல ரேட்டிங் கொடுத்திருந்ததோடு அங்கு தங்கிச் சென்றவர்களின் கருத்துக்களும் நல்லவிதமாக இருந்தது.  இந்த மாதம் பள்ளிக்குழந்தைகளுக்குப் பரிக்ஷை நடப்பதால் சுற்றுலாப் பயணிகள் கூட்டமும் இருக்காது என்பதால் ஹோட்டலில் அறையும் எளிதாகக் கிடைக்கும்.  ஏப்ரலில் பள்ளி விடுமுறை ஆரம்பிப்பதோடு சித்திரைத் திருநாளும் ஆரம்பிக்கும். கூட்டம் தாங்காது.  எல்லாவற்றையும் யோசித்து இந்த மாதமே போய்விட்டு வர முடிவெடுத்தோம்.  அதோட ரங்க்ஸுக்கு மதுரை மாவடு வாங்கணும்னு ஆசை.  இப்போதைய தினத்தை விட்டு விட்டு ஒரு பத்து நாள் தள்ளிப் போனாலும் மாவடு கிடைக்காது.  பத்து நாள் முந்திப் போயிருந்தாலும் கிடைச்சிருக்காது.  திங்களன்று கிளம்பிப் போனால் வார முதல்நாள் என்பதால் அறை கிடைப்பதிலும் கஷ்டம் இருக்காது என்பதோடு கோயிலிலும் கூட்டம் இருக்காது.  ஆகவே திங்களன்று கிளம்பிப் போய் அன்றும், மறுநாளும் மீனாக்ஷியைப் பார்க்கத் திட்டம்.  புதன் காலை கிளம்பி யானைக்கல் மார்க்கெட்டில் மாவடு, பாக்கு இன்னும் வேறே ஏதும் கண்ணில் பட்டால் வாங்கிக் கொண்டு அன்று மதியம் ஶ்ரீரங்கம் திரும்பவேண்டும். இது தான் எங்கள் திட்டம். போறதை யார் கிட்டேயும் சொல்லலை.  அமெரிக்காவில் இருக்கும் எங்க குழந்தைங்களுக்கு மட்டும் தெரியும். உள்ளூரில் நாத்தனார் வந்து தேடப் போகிறாரேனு அவருக்குச் சொன்னோம்.  இணையத்தில் ரேவதிக்கு மட்டும் சொல்லி இருந்தேன்.  இன்னொருத்தருக்குச் சொன்னேன்; அவர் புரிஞ்சுக்கலை.  சரினு விட்டுட்டேன். :) நடக்கப் போவது யாருக்குத் தெரியும்?


ரொம்பவே சந்தோஷத்தோடு  23-ந்தேதி திங்கட்கிழமை காலை திருச்சி பேருந்து நிலையத்திலிருந்து கிளம்பும் எங்குமே நிற்காத திருச்சி--மதுரை பேருந்தில் கிளம்பினோம்.  பேருந்துவில் உட்காரும் இடங்களெல்லாம் கிழிந்து போய்ப் பேருந்தே மிக மோசமான நிலையில் பராமரிப்புக்குக் காத்திருந்தது.  இதிலா போகணும்னு மனசு கேட்டாலும், மற்றப் பேருந்துகளெல்லாம் ஊரைச் சுற்றிக் கொண்டு போகும்.  இது ஒண்ணு தான் பைபாஸில் செல்லும் விரைவு வண்டி.  கிளம்பத் தயாராகவும் இருந்தது. சரி, பார்த்துக்கலாம்னு ஏறிட்டோம்.  ஓட்டுநரும் வண்டியை நல்லாவே ஓட்டினார்.  நாங்க போகையிலேயே ஒத்தக்கடையில் இறங்கி ஆனைமலை யோகநரசிம்மரைப் பார்த்துடணும்னு முடிவு செய்து அதுக்கேத்தாப்போல் கண்டக்டரிடம் சொல்லிப் பயணச் சீட்டும் வாங்கினோம்.

ஒத்தக்கடையில் நாங்க இறங்கின இடத்தருகேயே திருமோகூர் செல்லும் ரஸ்தாவும் இருக்க, அங்கேயும் முடித்துக் கொண்டே மதுரைக்குப் போகலாம்னு முடிவு செய்தோம்.  ஒத்தக்கடையில் காலை உணவு உண்ணும்படியான ஹோட்டல்கள் எதுவும் இல்லை.  ஆகையால் ஒரு  பேக்கரிக்குப் போய்  பிஸ்கட்டுகளும், காஃபியும் வாங்கிக் குடித்துவிட்டு அங்கேயே ஓர் ஆட்டோ பேசிக் கொண்டு யோக நரசிம்மரைத் தரிசிக்க முதலில் சென்றோம். ஆட்டோக்காரர்  இரண்டு கோயில்களும் போயிட்டுக் காத்திருந்து கூட்டி வர 200 ரூ. கேட்டார். சரினு ஒத்துக் கொண்டோம். அதிகம் தூரம் இல்லை என்றாலும் நடக்கவும் முடியாது.  இந்த வழியாவும் அழகர் கோயிலுக்கும் போகலாம் என்றாலும்  இங்கே முடித்துக் கொண்டு அங்கே போவதற்குள்ளாக மதியம் ஆயிடும். அப்புறமா நடை சாத்திட்டா மாலை நான்கு மணி வரை காத்திருக்கணும். ஆகையால் அழகர் கோயிலையும் இந்தப் பட்டியலில் சேர்க்கலை.