மோதி 19 முடிஞ்சது ஒரு வழியாக!

ட்ரம்ப் வந்து விட்டார். இந்திய, அமெரிக்கக் கொடிகளுடன் இரு நாட்டு தேசிய கீதங்களும் இசைக்கப்பட்டன.

எல்லோருமே எழுந்து நிற்க வேண்டி இருந்ததில் படம் இவ்வளவு தான் எடுக்க முடிந்தது. 

இருவரையும் ஒரே மேடையில் பார்த்து ஆர்ப்பரிக்கும் மக்கள் கூட்டம்

ட்ரம்பும் மோதியும். ட்ரம்ப் பேசுகையில் மோதி பக்கத்தில் நின்று கவனிக்கிறார்.

ட்ரம்ப் வரக் கொஞ்சம் தாமதம் ஆனது. பின்னர் அவர் வந்ததும் மோதியும் அவரும் சந்தித்துக் கைகுலுக்கிக் கொண்டார்கள். மோதி முதலில் பேசப் பின்னர் ட்ரம்ப் பேசினார். பின்னர் மோதி மேடையை விட்டுக் கீழே இறங்கியதும் ட்ரம்பையும் அழைத்துக் கொண்டு அந்தப் பெரிய மைதானத்தைச் சுற்றி வந்து மக்களைப் பார்த்துக் கைகளை ஆட்டித் தங்கள் சந்தோஷத்தைத் தெரிவித்துக் கொண்டார். அதன் பின்னர் அவர்கள் வெளியே கிளம்பும்வரையிலும் யாரையும் வெளியேற விடவில்லை. ஆனால் காலரியில் இருப்பவர்கள் அப்படியே வெளியேற ஆரம்பித்தனர். சுமார் 20 நிமிடக் காத்திருப்புக்குப் பின்னர் நாங்கள் வெளியே வந்தோம். நடுவில் அங்கே இருக்கையிலேயே மருமகளுக்குத் தொலைபேசியில் சாதம் மட்டும் வைக்கச் சொல்லிச் சொல்லி இருந்தோம். அது வரையிலும் காலையில் சாப்பிட்ட அரைகுறைச் சோளப்பொரி தான் உணவு.

மத்தியானம் 2 மணி வெயிலில் நம்மவரால் நடக்க முடியலை. கார்ப் பார்க்கிங்கினுள் வண்டியை நிறுத்தி இருந்தாலும் நிறுத்தி இருந்த இடம் கொஞ்சம் தள்ளி இருந்ததால் நடக்கத் தான் வேண்டி இருந்தது. சுமார் ஒரு ஃபர்லாங்காவது நடந்திருப்போம். வண்டிக்குள் வந்ததும் கையில் இருந்த வாழைப்பழத்தை ரங்க்ஸிடம் கொடுத்துச் சாப்பிடச் சொன்னோம். வண்டியை எடுத்தாலும் வரிசையில் காத்திருக்க வேண்டி வந்தது. அந்தப் பக்கம் உள்ள வாயில்கதவுகளைத் திறக்கவில்லை. ட்ரம்பும் மோதியும் அவர்கள் தங்குமிடம் போய்ச் சேர்ந்தாச்சு என்பதை உறுதிப் படுத்திக் கொண்ட பின்னரே திறந்தார்கள். பின்னர் அங்கிருந்து சாலைக்கு வந்ததும் வீட்டுக்கு ஓட்டம் பிடித்தது வண்டி. மூன்று மணி, மூன்றேகால் மணிக்கு வீட்டுக்கு வந்து சேர்ந்து சூடாகச் சாதத்தில் மோரை விட்டுக்கொண்டு எலுமிச்சை ஊறுகாயுடன் சாப்பிட்டோம். சொர்க்கம் கண்களில்!