வரகு அரிசியில் தேன்குழல் சாப்பிட வாங்க!

தீபாவளி வந்தாச்சா? இங்கே இப்போத் தான் வெடிச்சத்தம் கேட்க ஆரம்பிச்சிருக்கு!  நடுவில் கொஞ்சம் வேலை இருந்ததாலும், உடல் நலம் சரியில்லாமல் போவதாலும் எழுத முடியலை. அதோடு அடிக்கடி வலைப்பக்கம் திறக்க மறுத்து அடம் பிடிக்குது!  . இந்த தீபாவளிக்குக் கைத்தறிச் சேலை வாங்கியாச்சு! நெசவாளர் படத்தோடு கூடிய சேலைகள்! அந்த நெசவாளர்களுக்குப் பாராட்டுகள், நன்றி. சென்னையில் இருக்கிறச்சே மத்திய அரசால் நடத்தப்படும் ஹான்ட்லூம் ஹவுஸ், ரத்தன் பஜாருக்குத் தான் போவேன். இங்கே வந்ததில் இருந்து செட்டிநாடு பருத்திப் புடைவைகள் வாங்கினேன். இந்த வருஷம் தான் மறுபடி கைத்தறிக்குப் போகும் எண்ணம் வந்தது. சென்னையில் இருக்கும் கடையில் எல்லா மாநிலக் கைத்தறிகளும் கிடைக்கும். அநேகமாகக் கல்கத்தாப் பருத்திச் சேலைக்கே ஓட்டுகள் விழும். இந்த வருஷம் கோவை! நம்ம ரங்க்ஸ் வழக்கம் போல் கதருக்கே ஓட்டைப் போட்டார்.

அடுத்து பக்ஷணங்கள்! என்னத்தைப் பண்ணறது போங்க! அதான் உடம்பிலே சர்க்கரை ஆலையை வைச்சிருக்காரே ரங்க்ஸ்! ரொம்பவே மண்டையை உடைச்சுண்டு கடைசியில் பாசிப்பருப்பு+கடலைப்பருப்பு வறுத்து மிஷினில் மாவாகத் திரிச்சு அதிலே உருண்டை பிடிக்கலாம்னு முடிவு பண்ணி மாவைத் தயார் செய்தேன். அப்புறமா காரம்? முன்னெல்லாம் முள்ளுத் தேன்குழல், ஓமப்பொடி, ரிப்பன் பக்கோடா, மிக்சர்னு விதம் விதமாப் பண்ணிட்டு இருந்தேன். இப்போ பண்ணும் ஒரு தேன்குழலையே தீர்க்கணும்னு கவலையா இருக்கு. அதோடு இப்போத் தான் சிறுதானியங்கள் சாப்பிடறோமே! ஆகவே அதிலே தான் தேன்குழல் பண்ணணும்னு முடிவு செய்தோம். சில சிறு தானியங்கள் தீர்ந்து போனதை வாங்கி வைச்சிருந்தேன். அதிலே இருந்து அரைக் கிலோ வரகை எடுத்து வறுத்தேன். 100 கிராம் பாசிப்பருப்பு, 100 கிராம் கடலைப்பருப்பையும் வறுத்து அதோடு சேர்த்தேன். மிஷினில் கொடுத்து மாவு திரிச்சாச்சு. இன்னிக்கு முதலில் உருண்டையைப் பிடிச்சேன். உருண்டை படம் அப்புறமா! ஹிஹிஹி, எடுக்கலை.  இப்போத் தேன்குழல் படம் மட்டும் போடப் போறேன்

இதோ தேன்குழலுக்குப் பிசைந்த மாவு. மாவைக் கொஞ்சம் கொஞ்சமாகப் பிசைந்துக்கணும். எட்டுக் குழிக்கரண்டி மாவோடு ஒரு டேபிள் ஸ்பூன் வெண்ணெய், பெருங்காயம் அரை டீஸ்பூன், ஒரு டீஸ்பூன் உப்புச் சேர்த்து நன்கு கலந்து கொண்டு பின்னர் கொஞ்சம் கொஞ்சமாக நீர் விட்டுச் சப்பாத்தி மாவு பதத்துக்குப் பிசையணும். முதல் ஈட்டில் ஒரு டீஸ்பூன் உப்புப் போட்டது எங்களுக்குக் கொஞ்சம் ஜாஸ்தியாத் தெரிஞ்சதாலே அடுத்த ஈட்டில் முக்கால் டீ ஸ்பூன் தான் உப்புச் சேர்த்தேன். அது சரியா இருக்கு. ஆகவே உப்பு அதிகமாய்த் தெரிந்தால் நீர் விட்டுப் பிசையும் முன்னர் இன்னும் கொஞ்சம் மாவைச் சேர்க்கலாம். தீபாவளி பக்ஷணம் செய்யறதிலே இது ஒரு சௌகரியம். அது என்னமோ தெரியலை! பக்ஷணத்தைச் சாப்பிட்டுப் பார்த்துட்டு உம்மாச்சிக்குக் காட்டலாம். உம்மாச்சி கோவிச்சுக்கறதில்லை.  கீழே பிசைந்த மாவு பாத்திரத்தில்.

அடுத்து அடுப்பில் வேகும் தேன்குழல்கள்

சத்தியமாய்ச் சொல்றேன். இது வரகு அரிசியில் செய்த தேன்குழல் தான். ஏனெனில் நம்ம ரங்க்ஸுக்கே ஆச்சரியம்! இப்படி வெள்ளையா வருதேன்னு! :)