தீபாவளி மருந்து கிளறினால் பக்ஷண வேலை முடிஞ்சது! :)

இன்னிக்கு அதே வரகு அரிசி மாவில் கொஞ்சம் மிளகாய்த் தூள், உப்பு, பெருங்காயம் சேர்த்து வெண்ணெய் போட்டுப் பிசைந்து ரிப்பன் பக்கோடா செய்தேன். ரொம்பக் கொஞ்சம் போல்! ரிப்பன் பக்கோடா செய்தே பல வருடங்கள் ஆகின்றன. அப்புறமா வேறே ஸ்வீட் எல்லாம் பண்ணலை! மருந்து கிளறினேன் தீபாவளி மருந்து கிளறத் தேவையான சாமான்கள் கீழே கொடுத்துள்ளேன். இதில் ஓமம் சேர்த்தால் அவ்வளவாக நன்றாக இருக்காது. அதோடு எல்லா சாமான்களும் சம அளவில் இருக்கணும். இவை எல்லாம் விலை அதிகம் என்பதால் நாட்டு மருந்து சாமான் கடையில் குறைந்த பட்சமாகப் பத்து ரூபாய்க்குக் கேட்டால் கொடுப்பார்கள் வாங்கிக் கொள்ளவும். ஓரளவுக்கு எல்லா சாமான்களையும் சம அளவில் எடுத்துக்கொள்ளவும். கண் திட்டமாகவே எடுத்துக்கலாம். வெயில் இருந்தால் கொஞ்சம் காய வைச்சுக்கலாம். இல்லை எனில் சுத்தம் செய்துவிட்டு வெறும் வாணலியில் (இரும்பு வாணலி நல்லது) வறுத்து ஆற வைத்து மிக்சி ஜாரில் பொடித்துக் கொள்ளவும்.

வறுத்துப் பொடிக்க வேண்டிய சாமான்கள்.

சுக்கு
மிளகு,
ஜீரகம்,
சோம்பு,
கசகசா,
கிராம்பு,
ஏலக்காய்,
கருஞ்சீரகம்
இலவங்கப்பட்டை,
சித்தரத்தை,
திப்பிலி,
தேசாவரம் அல்லது கண்டந்திப்பிலிக்குச்சிகள்
ஜாதிபத்திரி

இது எல்லாத்தையும் நல்லாக் காய வைச்சுச் சம அளவு எடுத்துக்கவும். வெறும் வாணலியில் வறுக்கவும். வறுத்ததை மிக்சியில் போட்டு நன்றாய்ப் பொடியாக்கவும். அநேகமாய் நைசாகவே வரும். அப்படிக்கொஞ்சம் கொர கொரனு இருந்தாலும் பரவாயில்லை. பொடியைத் தனியாய் வைத்துக்கொள்ளவும்

இனி பச்சையாய் அரைக்க
இஞ்சி 50 கிராம்
கொத்துமல்லி விதை 100 கிராம்
இவற்றை நன்கு நீர் விட்டு அரைத்து, வடிகட்டிச் சாறு எடுத்துக்கொள்ளவும். மூன்று நான்கு முறை அரைத்துச் சாறை எடுக்கலாம்.

கருப்பட்டி பிடித்தால் கருப்பட்டி அல்லது வெல்லம். தூளாக்கியது ஒரு கிண்ணம் அல்லது 100 கிராம். கிளறுவதற்குத் தேவையாக ஒரு கரண்டி அல்லது ஐம்பது கிராம் நல்லெண்ணெய், ஐம்பது கிராம் நெய். சுத்தமான தேன் ஒரு கரண்டி.

நல்ல இரும்புச் சட்டியில்(நான் - ஸ்டிக் எல்லாம் சரிப்படாது. இரும்பின் சத்து மருந்தில் சேரணும்) இஞ்சி, கொத்துமல்லிச் சாறை விட்டுக் கொதிக்க விடவும். நன்கு தள தளவெனக் கொதிக்கும்போது தூளாக்கிய கருப்பட்டியைப் போடவும். கருப்பட்டி கரைந்து வாசனை போனதும், பொடி பண்ணி வைத்த மருந்துக் கலவையைக் கொஞ்சம் கொஞ்சமாய்ச் சேர்க்கவும். விடாமல் கிளறவும். நடுவில் கொஞ்சம் நெய், நல்லெண்ணெய் சேர்த்துக் கிளறிக் கொண்டு இருக்கவும். கையில் ஒட்டாமல் உருட்டும் பதம் வந்ததும் கீழே இறக்கி ஆற வைக்கவும். ஆறியதும் தேனைச் சேர்த்து, ஒரு டப்பாவில் போட்டு வைக்கவும். ஒரு சின்ன ஸ்பூனால் ஒரு உருண்டை சாப்பிட்டாலே போதுமானது.