ஆடிப் பெருக்கு வாழ்த்துகள்!

அனைவருக்கும் ஆடிப் பெருக்கு வாழ்த்துகள். காவிரியில் கொஞ்சம் போல் தண்ணீர் விட்டிருக்காங்க. ஆனால் நான் இன்னமும் மாடியில் போய்ப் பார்க்கவில்லை. மாடி ஏறத் தடா! ஆனால் எப்படியும் போய்ப் பார்த்துட்டு வந்துடுவேன். கீழே அம்மா மண்டபம் போயும் பார்க்கலாம். ஆனால் அங்கே இன்று ஒரே கூட்டம். காலையிலிருந்து மக்கள் கூட்டம்! தெருப் பூராக் கடைகளும் முளைத்துள்ளதாம். நான் கீழே இறங்கவில்லை. வழக்கமாய்ப் பெருமாள் வருவார் காவிரிக்குச் சீர் கொடுக்க. அனால் இம்முறை இன்று வரவில்லை. அதுவும் ஒரு காரணம் நான் கீழே இறங்காததற்கு. ஆடி 28 ஆம் தேதி தான் பெருமாள் வரப் போகிறாராம். ஜ்யேஷ்டாபிஷேஹம் முடிந்து இன்னமும் 48 நாட்கள் ஆகலைனு நினைக்கிறேன்.

நாங்க கோயிலுக்குப் போயும் 2,3 மாதங்கள் ஆகிவிட்டன. வெயில் காரணமாய்ப் போகவில்லை. அங்கே தாயார் சந்நிதிக்குப் போகும் வழியெல்லாம் சூடு தாங்காது! என்னதான் பாட்டரி காரில் போனாலும் அதுவும் எப்போதும் கிடைக்கணுமே!

இன்று ஆடி பதினெட்டுக்குச் சும்மா எளிமையாகச் சமைச்சேன். தேங்காய் சாதம், வெல்ல சாதம், எலுமிச்சை சாதம், (எலுமிச்சம்பழம் இல்லை என்பதால் நாரத்தங்காய்ச் சாறில் சாதம் செய்தேன்.) தயிர் சாதம். தொட்டுக்க அப்பளம், வடாம் தான். கொஞ்சம் போல் ஆமைவடை/ஆமவடை(?).  மேலே உள்ள படங்களில் பார்க்கலாம். சாதம் எல்லாம் கொஞ்சம் கொஞ்சம் மிச்சம் இருக்கு. வேணும் என்பவர்கள் எடுத்துச் சாப்பிடலாம். :)))))