பில்லா பட விமரிசனம், கார்த்திக்குக்காக ஒரு பதிவு!

ரொம்பா நாளாச்சு "பொதிகை"த் தொலைக்காட்சி பற்றி எழுதி. கை துரு துரு னு எழுது, எழுதுனு சொல்லிட்டே இருந்தது. இருந்தாலும் சரியான விஷயம் மாட்ட வேணாமா? இப்போத் தான் பொதிகையில் "பில்லா" படம் முதல் முறையாப் பார்த்தேன். அதனால் விமரிசனம் அதைப் பத்தியே எழுதலாம்னு முடிவு செய்தேன். அது ஒரு பக்கம் இருக்கட்டும், இன்னிக்குக் காலம்பர 9-30 மணிக்குப் பார்த்த போது டாக்டர் என்.வி.சுப்பராமன் என்பவர், கண்ணனின் "பால லீலை" பற்றிய ஒரு இசைச் சித்திரம் கொடுத்துக் கொண்டிருந்தார். உடன் பாடியவர் திருமதி என்.வி. அலமேலுனு போட்டிருந்தது. நிகழ்ச்சியைப் பாதியில் இருந்து பார்த்துக் கொண்டிருந்த காரணத்தால் யார் நிகழ்ச்சினு புரியாமல் மண்டை வெடிச்சுடும் போல் இருந்தது. பொதிகையில் சில சமயம் பேர் போடாமலே நிகழ்ச்சிப் "படைப்பு, பொதிகைத் தொலைக்காட்சி"னு மட்டும் போட்டுட்டுப் பேசாமல் போயிடுவாங்க, அவங்களுக்கு என்ன தெரியும் எங்களுக்குள் நடக்கும் வாத, விவாதம் எல்லாம், ஒரு நாளைக்கு வந்து பார்த்தால் புரியும், அப்புறம் ஒழுங்கா பேர் எல்லாம் போடுவாங்க, நிகழ்ச்சியின் நடுவிலே கூட! :P இன்னிக்கு என்னமோ அதிசயமா நிகழ்ச்சி முடிஞ்சதும் எல்லார் பேரையும் போட்டுட்டாங்க! அதனால் தெரிந்து கொள்ள முடிஞ்சது. நிகழ்ச்சி நல்லாவே இருந்தது, ஆனால் "ஆடாது அசங்காது வா!" பாட்டைப் பாடிய விதம் இதுவரை கேட்காத ராகத்தில் (கேட்டால் மட்டும் ராகம் பேர் தெரிஞ்சுடுமாக்கும்? ம.சா. கேள்வி!) இருந்தது, என்றாலும் நன்றாகவே பாடினார். நல்ல நிகழ்ச்சி. இப்போ "பில்லா" திரைப்பட விமரிசனம்.

"பில்லா" படத்தைப் பற்றியே எல்லாரும் ரொம்பப் பேசிக்கும்போதெல்லாம், நாம் இந்தப் படத்தை எப்படியாவது பார்க்கணும்னு நினைச்சுப்பேன். அதுக்கு ஞாயிறு அன்றுதான் நேரம் வாய்த்தது, என்றாலும், வழக்கம் போல் முழுப்படமும் பார்க்க முடியவில்லை! :D நான் பார்க்க ஆரம்பித்த போது டி.எஸ்.பி.யான பாலாஜி காரை ஓட்ட, பின்னால் பில்லாவான ரஜினி துப்பாக்கி முனையில் அவரை மிரட்டிக் கொண்டிருந்தார். ஹிஹிஹி, அஜித் நடிச்ச பில்லானு வந்தவங்களுக்கு, சாரி, நான் பார்த்தது, ரஜினியோட பில்லாதான். எப்போ வந்ததுனு தெரியலை, இப்போத் தான் பார்த்தேன். :D மிரட்டியவர் திடீர்னு செத்து விழ, அவரைக் கல்லறையில் புதைத்த பாலாஜி, இதை யார் கிட்டேயும் சொல்லாததும் கொஞ்சம் குழப்பமாய் இருந்தது. எப்படியும் இன்னொரு ரஜினி இருப்பார், அல்லது, இந்த ரஜினியே சாகவில்லை, எல்லாம் ஒரு நாடகம், போலீசோடு சேர்ந்து, சவப்பெட்டிக்கு அடியில் இருக்கும் துவாரம் வழியாகத் தப்பி வந்துவிடுவார் என்று நம்பிக்கொண்டு மேற்கொண்டு படத்தைப் பார்த்தேன்.

கடைசியில் பார்த்தால் மனோரமாவோடு, நாட்டியம் ஆடிப் பிழைக்கும் ரஜினிதான் பில்லாவாக மாறுகிறார். அவரின் இந்த ஸ்டைல் தான் அஜித்தால் "வரலாறு" படத்தில் ஜி3 பண்ண ஒரு காரணம்னு நான் சொன்னால் ஏற்கெனவே என்னிடம் கோபத்தில் இருக்கும், நம்ம கார்த்திக்குக்கு இன்னும் கோபம் வரும், அதனால் அதை உங்கள் ஊகத்துக்கே விடறேன். பில்லாவாக மாற்றப்பட்ட ராஜப்பாவான ரஜினியின் நடவடிக்கையில் சந்தேகப் படும் அந்த நடிகை யாருன்னு தெரியலை. பில்லாவைக் கொல்லும் வெறியுடன் இருக்கும் ஸ்ரீப்ரியாவுக்கும் சந்தேகம் வரலை! ஏனெனில் அந்த சந்தேகக் கேஸ் நடிகையுடன் தான் பழைய பில்லா நெருக்கம்னு சொல்றாங்க. ஆனால் அந்தக் காட்சிகள் காட்டினாங்களான்னு தெரியலை, ஹிஹிஹி, லேட்டாப் பார்த்தேன் இல்லை? அப்பாடி, ஒருவழியா, இந்த ராஜப்பா பில்லா இல்லைனு தெரிஞ்சு, ஸ்ரீப்ரியாவுக்கும் இவர்தான் ஹீரோனு புரிஞ்சு, இவர் மேல் காதல் வந்து, இரண்டு பேரும் டூயட் பாடி, என்னத்தை டூயட்? பாட்டு ஒண்ணும் மனசிலேயே நிக்கலை! அப்புறம் அனாவசியமாய் பாலாஜியைச் சாகடிச்சு, அந்தக் காட்சியைப் பார்க்க முடியலை, வேறே ஏதோ வேலையாப் போயிட்டேன், அப்புறம் ஃப்ளாஷ் பாக்கில் யார் கொன்னாங்கனு காட்டும்போதுதான் பார்த்தேன். அது என்னமோ ஆச்சரியமா இருக்கு! ரஜினி சிவப்புக் கலர் டயரியைத் தூக்கிப் போட்டுட்டு, அது கீழே இறங்குறதுக்குள், எதிரிகளைப் பந்தாடுவதும், சரியா அந்த டயரி அப்புறமா மெதுவா ரஜினி கையிலே வந்து இறங்குறதும், நானும் முயற்சி செய்து பார்த்தேன், நான் தூக்கிப் போட்டுட்டு, யாரை அடிக்கிறதுனு யோசிக்கிறதுக்குள், என் டயரி கீழே வந்து என்னையே அடிச்சுட்டது. இந்தப் படம் ரீமேக்கில் அஜித்தை வச்சு எடுத்திருக்கிறது இன்னும் பார்க்கலை, தொலைக்காட்சிகளில் வரும் விமரிசனம் கூடப் பார்க்கவில்லை. நான் பார்க்கும்போதெல்லாம் திரும்பத் திரும்பக் கல்லூரி படத்தின் வகுப்பறையில் "காமாட்சி" அறிமுகம் செய்து கொள்ளும் காட்சியும், பஸ்ஸில் மாணவர்கள் கலாட்டா பண்ணுவதும் தான் காட்டுகிறார்கள். எல்லாம் ஹெட் லெட்டர்.
**************************************************************************************

இந்தப் பதிவு கார்த்திக்குக்கும், ரசிகனுக்கும் சமர்ப்பணம். கார்த்திக் ரொம்ப நாளா என்னோட பதிவுகளுக்கு வரதே இல்லை. அந்த வருத்தத்திலும், ஒவ்வொரு முறை நான் ஊருக்குப் போகும்போதெல்லாம் கிட்டத்தட்ட போஸ்டர் ஒட்டி, அலங்கார வளைவுகள் வச்சு, மலர் அலங்காரமெல்லாம் செய்து வலை உலகம் முழுக்கத் தெரிவிக்கும் ஒரு அணுக்கத் தொண்டர் இப்போ இப்படி சுறுசுறுப்பே இல்லாமல் உட்கார்ந்திருக்கிறாரே, அவரைத் தட்டி எழுப்பும் விதமாய் எழுதி இருக்கேன்.

அடுத்து ரசிகனுக்கு என்னோட ஃபோட்டோ போடணுமாம். பயந்துக்குவீங்கனு சொன்னால் கேட்கிறதே இல்லை. கமல், ரஜினி, சூர்யா, அசின், ஸ்ரேயா, த்ரிஷா இன்னும் எல்லார் படமும் இருக்கு, உங்க படம் மட்டும் இல்லைனு சொல்றார். கூடிய சீக்கிரம் அவரோட ஆவலை நிறைவேத்தறேன். அதுவரை பொதிகை பத்தி ரொம்ப நாளா நான் ஒண்ணுமே எழுதலைங்கிற அவரோட குறை தீர இந்தப் பதிவு. அப்புறம் அவரோட பதிவிலே வந்து கமெண்டச் சொல்றார். எங்கே? பதிவைத் திறந்தால் கணினியே ஹாங்க் ஆகிடறது. சொன்னால் மனுஷன் கிண்டல் செய்யறார். ஆனால் இன்னும் சிலருக்கும் அந்தப் பிரச்னை இருக்குனு உளவுப்படை தகவல். ஆகவே அவரோட பதிவுக்கு வந்து பின்னூட்டம் போடணும்னால் முதலில் அதை அவர் சரி செய்யணும். அப்புறம், வரலைன்னு சொன்னால் நான் பொறுப்பு இல்லை!