திருப்பாவைக் கோலங்கள்

பாடல் 7

கீசுகீசு என்றெங்கும் ஆனைச்சாத்தன் கலந்து
பேசின பேச்சரவம் கேட்டிலையோ? பேய்ப்பெண்ணே!
காசும் பிறப்பும் கலகலப்பக் கைபேர்த்து
வாச நறுங்குழல் ஆய்ச்சியர் மத்தினால்
ஓசை படுத்த தயிர் அரவம் கேட்டிலையோ?
நாயகப் பெண்பிள்ளாய்! நாராயணன் மூர்த்தி
கேசவனைப் பாடவும் நீ கேட்டே கிடத்தியோ?
தேசம் உடையாய்! திறவேலோர் எம்பாவாய்.



புள்ளி வைத்த  விளக்குக் கோலம் எதானாலும் போடலாம். இந்தக்கோலம் நன்றி உதயன். 2,3 வருடங்கள் முன்னர் மின் தமிழ்க் குழுமத்தில் ஒவ்வொரு நாளும் ஒவ்வொரு கோலம் உதயன் வரையப் பாட்டின் பொருள் கொண்டு  துணை செய்திருக்கிறேன். அப்போது போடப் பட்ட கோலங்கள் தாம் இவை. உதயன்  இந்தச் சுட்டியில் உதயனின் கோலங்களைக் காணலாம்.



இந்த ஆனைச்சாத்தன் தாமதமாய் எழுந்திருக்கும் பறவையோனு ஒரு சந்தேகம் இருந்து வந்தது.  அது இல்லைனு புரிஞ்சது.  கரிக்குருவியைத் தான் ஆனைச்சாத்தன் என்கிறார்கள். இந்தக் கரிக்குருவி முதல்லேயே எழுந்திருக்கும்.  இதை நான் ராஜஸ்தானில் இருக்கிறச்சே அநேகமா தினம் பார்த்திருக்கேன். அங்கே வீட்டுக்கூரையில் கூடு கட்டித் தங்கி இருந்தது.  காலையில் குயிலுக்கும் முன்னால் இது எழுந்திருக்கும். அந்த ஆனைச் சாத்தன் பேச்சைப் பற்றிக் குறிப்பிடும் ஆண்டாள் அடுத்து காசும், பிறப்பும் என்கிறாள்.

யார் கிட்டே எல்லாம் காசும், அதற்கேற்றாற்போன்ற பிறப்பும் இருக்குமோ அங்கெல்லாம் பேச்சும் ஜாஸ்தியாத் தான் இருக்கும் என்பது நாம் அறிந்ததே!  இங்கே குறிப்பிடுவது அது அல்ல. ஆயர்பாடிப் பெண்கள் இரு வகையான தாலியை அணிந்திருந்தார்களாம்.  ஒன்று பொற்காசுகளால் செய்த அச்சுத் தாலியும் இன்னொன்று முளைகளாக அமைத்துச் செய்த ஆமைத் தாலியும்


அணிந்திருந்தார்களாம்.  அந்தத் தாலிகள் அவர்கள் தயிர் கடையும்போது ஒன்றோடொன்று உராய்ந்து ஏற்படுத்திய சப்தத்தையே ஆண்டாள் இங்கே காசும் பிறப்பும் கலகலப்பக் கைபேர்த்து என்கிறாள்.  ஆனால் இதையே தத்துவரீதியாகப் பார்த்தால் திவ்யப் ப்ரபந்தங்களையும், பெருமானைக் குறித்த ஸ்லோகங்களையும் அவன் திருக்கோயிலில் அடியார்கள் ஒன்று சேர்ந்து சொல்லும் சப்தத்தையும் குறிக்கிறது என்பார்கள்.  அந்த நாராயண மூர்த்தி கேசவனின் திருநாமத்தை ஒரு தரம் சொன்னாலும் போதுமே.  அதைக் கேட்டபின்னருமா நீ உறங்குகிறாய்? எனத் தன் தோழியைக் கேட்கிறாள் ஆண்டாள்.


கோலம் படம் தவிர மற்றவை நன்றி: கூகிளார்