உங்க வீட்டுப்பாப்பாவுக்கு ஒரு பாடல்!

குழந்தை முகம் பார்த்துச் சிரிக்க ஆரம்பிச்ச கொஞ்ச நாட்களிலேயே குப்புறத்திக்கொள்ள முயலும். மெல்ல மெல்லக் குப்புறத்திக்கும். பின்னர் தலையைத் தூக்கும். தலையைத் தூக்கி நம்மைப் பார்த்துச் சிரிக்கும். நாம் கையில் தூக்கிக் கொண்டால் நம் வயிற்றில் காலை வைத்து உதைத்துக் கொண்டு மேலே ஏறும்.
அடுத்து ஆறு மாசம் ஆகும்போது கைகளைப் பயன்படுத்தத் தெரிந்திருக்கும். கையை வாயில் கொண்டு போகும். அப்போக் கிருஷ்ணா, ராமா, கோவிந்தா சொல்லிக் கொடுத்தால் புரிந்து கொண்டு கையைத் தட்டும். மாசம் ஆனால் கையை மேலே தூக்கிக் கொண்டும் கோவிந்தா போடும். பின்னர் குழந்தையை இடுப்பில் வைத்துக் கொண்டு கீழ்க்கண்ட பாடலைப் பாடினால் இடுப்பிலேயே குதிக்கும். கையில் பிடிபடாமல் ஆடும்! முன்னும், பின்னும் ஆடும்.


சங்குசக்கர சாமிவந்து
ஜிங்கு ஜிங்குனு குதிக்குமாம்!

கொட்டு கொட்டச் சொல்லுமாம்-அது
கூத்தும் ஆடப் பண்ணுமாம்!

உலகம் மூன்றும் அளக்குமாம்!--அது
ஓங்கி வானம் அளக்குமாம்!

கலகலன்னு சிரிக்குமாம்!--அதைக்
காணக்காண இனிக்குமாம்!

அடுத்து நீஞ்சித் தவழ முற்படும் போது முதலில் முட்டிக்கால் போட்டுக் கொண்டு முன்னும், பின்னும் ஆடும் குழந்தை!

அப்போப் பாடும் பாடல்

ஆனை ஆனை! அழகரானை!
ஆனயும் குட்டியும் ஆடுமானை!

ஜல்லைக் கரும்பை முறிக்கும் ஆனை!
சீராடி சீராடிக் கொஞ்சும் ஆனை!

குட்டி ஆனைக்குக் கொம்பு முளச்சுதாம்!
பட்டணமெல்லாம் பறந்தோடிப் போச்சாம்!

எங்க குட்டிப் பேத்திக்கு இந்தப்பாடலைப் பாடினால் குதிப்பாள்! தவழ ஆரம்பிக்கும் குழந்தை உட்கார முயற்சிக்கும்போது கொஞ்சம் சாய்ந்தாப்போல் தான் முதலில் உட்காரும். அப்போப் பாட வேண்டிய பாடல்

சாய்ந்தாடம்மா சாய்ந்தாடு!
சாயக் கிளியே சாய்ந்தாடு!/சந்தனக்கிளியே சாய்ந்தாடுனும் பாடலாம்.
குத்துவிளக்கே சாய்ந்தாடு!
கோவில் புறாவே சாய்ந்தாடு!

உட்கார்ந்து கொண்ட குழந்தை தவழ ஆரம்பித்தால் கொஞ்சம் ஆடிக்கொண்டே போகும். அப்போ

ஆடுமாம் பெருச்சாளி ஆடுமாம்
அது ஐந்து கொழுக்கட்டைக்கு ஆடுமாம்
குட்டிப் பெருச்சாளி ஆடுமாம்
கொழுக்கட்டை கொண்டான்னு கேட்குமாம்

அடுத்து எழுந்து நிற்க முயல்கையில் கீழே பொத், பொத் என்று விழும்.

யானை வந்தது யானை
எங்கே வந்தது யானை
சண்டைக்கு வந்தது யானை
சறுக்கி விழுந்தது யானை

என்று சொல்லிக் கைதட்டினால் குழந்தையும் கை தட்டும். சிரிக்கும்.

குழந்தை அழும்போது பாடும் தாலாட்டு

ஆராரோ ஆராரோ ஆரிரரி ஆராரோ

ஆரடிச்ச கண்ணீரு ஆறாப் பெருகுது!
அடிச்சாரைச் சொல்லி அழு ஆக்கினைகள் செய்து வைப்பேன்!
தொட்டாரைச் சொல்லி அழு தோள்விலங்கு பூட்டி வைப்பேன்!

மாமன் அடிச்சானோ மல்லிகைப் பூச் செண்டாலே
பாட்டி அடிச்சாளோ பால் போட்டும் சங்காலே
அத்தை அடிச்சாளோ அல்லிப் பூச் செண்டாலே
அம்மா அடிச்சாளோ அரவணைக்கும் கையாலே

ஆரடிச்ச கண்ணீரு ஆறாப் பெருகுறது!

இன்னொரு தாலாட்டு!


கண்ணான கண்ணுக்கு கண்ணீரு ஆகாது
சுண்ணாம்பும் மஞ்சளுமாய் சுத்தியெறி கண்ணாக்கு
வேப்பலையும் காப்புமாய் வீசியெறி கண்ணாக்கு

கண்ணான கண்ணோ கரும்பான செங்கரும்போ
செங்கரும்போ தேனோ திகட்டா திரவியமோ

முத்து முத்தாம் செங்கழனி முத்தமெலாம் கொத்தரளி
கொத்தரளி பூ பூக்கும் கொடியரளி பிஞ்சு விடும்
நித்தம் ஒரு பூ பூக்கும் நிமிஷம் ஒரு பிஞ்சு விடும்
நூத்திலொரு பூவெடுத்து முடிப்பார் மகளாரோ?

ஆறிரெண்டும் காவேரி அதன் நடுவே ஸ்ரீரங்கம்
ஸ்ரீரங்கம் ஆடி திருப்பாற் கடலாடி
மாமாங்கம் ஆடி மதுரைக் கடலாடி
தைப்பூசம் ஆடி நீ தவம் பெற்று வந்தாயோ

யாரடா தோட்டத்திலே மானடா மேய்கிறது
மானோடும் வீதியெல்லாம் தானோடி வந்தாயோ
தானோடி வந்து தந்த திரவியமோ
தேனோ திரவமோ திலகமோ சித்தடியோ

சித்தடியே சித்தடியே இத்தனை போதெங்கிருந்தாய்
சுற்றிவந்து பூப்பறிக்கும் என் சித்தடியே யாரடிச்சா

பாட்டி அடிச்சாளோ பால் போட்டும் கையாலே
அத்தை அடிச்சாளோ அரவணைக்கும் கையாலே
சித்தி அடிச்சாளோ சீராட்டும் கையாலே
அம்மான் அடிச்சானோ ஆதரிக்கும் கையாலே