"கஜ, கஜ, கஜேந்திரா!" கஜா வந்துட்டான்!

படத்துக்கு நன்றி. தமிழ் "தி இந்து" கூகிளார் வாயிலாக!

இந்தப் புயலுக்கு "கஜா"னு பெயர் வைச்சதாலேயோ என்னமோ தெரியலை தமிழ்நாட்டில் ஒரு மாவட்டம் விடாமல் எட்டிப் பார்த்திருக்கான். முன்னால் வந்த "வார்தா"வோ அதுக்கு முன்னர் வந்த "தானே" மற்றும் மற்ற புயல்களோ அப்படி ஊரெல்லாம் சுத்தலை! இவனுக்குக் கால் நீளமா முளைச்சிருந்திருக்குப் போல! நாலு நாளா வரேன், வரேன்னு சொல்லிட்டுப் போக்குக் காட்டிக் கொண்டு இருந்தவன் நேற்றிரவு பனிரண்டு மணிக்கு உள்ளே நுழைஞ்சுட்டான். இரவெல்லாம் மழை பெய்திருக்கு. இப்போ வெயில் தலை காட்டுகிறது. ஆனால் "கஜா" புயலின் காரணமாக மழை  புல்லுக்கும் ஆங்கே பொசிந்து கொண்டிருந்திருக்கிறது. மழையே காணாத திருச்சி, ஸ்ரீரங்கத்திலும் மழை வருது, வந்திருக்குன்னால்!  நல்ல வேகமா இங்கேயே காற்றடிக்குது. எங்க வீட்டு ஸ்வாமி அலமாரியைப் பார்த்தவங்க அது எவ்வளவு உள்ளே தள்ளி இருக்குனு புரியும். அங்கேயே விளக்கு ஏற்றி வைத்தால் அணைந்து போகிறது. சமையலறையிலும் ஜன்னல் வழி வேகமான காற்று! இரவெல்லாம் மழை! காலை ஐந்து மணியிலிருந்து வேகமான காற்று! அவ்வப்போது தூறல்களும். இன்னிக்கு ஆண்டாள் வரலை! இன்னைக்குத் துலாமாசக் கடைசி நாள்   கடைமுகம் ஆண்டாளை எப்படியேனும்  இன்னிக்குப் பார்க்கலாம்னு நினைச்சேன். ஆனால் கீழேயே போகலை!  அப்போது தூற்றல் பலமாக இருந்ததால் நம்பெருமாளின் திருமஞ்சனத்துக்காகத் தங்கக் குடத்தில் காவிரி நீர் எடுக்க   ஆண்டாளும் வரவில்லை! 

கிட்டத்தட்ட ஒரு பதிவு எழுதியும் மின்சாரம் போனதால் சேமிக்க முடியாமல் பதிவு காணாமல் போய்விட்டது! :))) காலை ஐந்தரைக்கே போன மின்சாரம் இப்போத் தான் வந்திருக்கு! பயங்கர வேகத்தோடு காற்று அடித்தது.  காற்று வேகத்தோடும் சப்தத்தோடும் "உய்ங்க்" எனக் கோபமாக வீசிக் கொண்டிருந்தது. மரங்கள் அனைத்தும் காற்றின் வேகத்துக்குக் கட்டுப்பட்டு சாய்ந்தாடம்மா விளையாடிக்கொண்டிருந்தன. அப்படி விளையாடாத மரங்கள் கீழே விழுந்தன.இங்கேயே இப்படி எனில் கடலோர மாவட்டங்களில் கேட்கவே வேண்டாம். சற்று முன் தொலைக்காட்சிகளில் கஜா புயலால் பாதிக்கப்பட்ட இடங்களைக் காட்டினார்கள். அவற்றில் திருச்சியும் இடம் பெற்றிருக்கிறது.

புதுக்கோட்டை, திண்டுக்கல் வரை இம்முறை கஜா போய் எட்டிப் பார்த்திருக்கு. மழை இங்கே இரவு பெய்தது தான். காலை சிறிது தூற்றல்! அப்புறமா அதுவும் நின்று காற்று மட்டுமே அடித்துக் கொண்டு இப்போக் காற்றும் நின்று வானம் வெளி வாங்கி இருக்கு! இங்கே எங்க குடியிருப்பு வளாகத்தில் இருந்து அம்மாமண்டபம் செல்லும் வழியில் நடைமேடையில் உள்ள மரங்கள் கிளைகள் முறிந்து போக்குவரத்துக்குக் கொஞ்சம் இடையூறு! மின்சார ட்ரான்ஸ்ஃபார்மர்கள் வேறே பிரச்னைகள்! இப்போத் தான் ஒரு வழியா மின்சாரம் வந்திருக்கு!  இனி தான் ஒவ்வொன்றாக மற்ற வேலைகளைப் பார்க்கணும். இன்னிக்கு வழக்கமான பால்காரர் வரவில்லை. ஆனால் "ஆவின்" பால் கிடைச்சது! :)