தீபாவளி கொண்டாடியாச்சா?

ஒரே விளக்கைப் போட்டால் வெளிச்சம் எப்படி விழுதுனு பார்த்ததில் ராமர் இப்படி வந்தார்.

அதே விளக்கு வெளிச்சத்தில் கீழே பளிச்!

அந்தக் கத்திரிப்பூக் கலர்ப் புடைவை சில்க் காட்டன், இன்னொண்ணு கொஞ்சம் வெளிறிய கிளிப்பச்சைக்கலர் நெகமம்! சில்க் காட்டன் தான் இன்னிக்குக் கட்டிண்டேன். 

இவை குளிக்கும் முன்னர் எடுத்த படங்கள்

குளிச்சுட்டு வந்து நிவேதனம் பண்ணும்போது எடுத்த படம் இது! அது என்னமோ தெரியலை! தீபாவளி பக்ஷணங்கள் மட்டும் சாப்பிட்டாலும் மறுபடி தீபாவளி அன்னிக்கும் உம்மாச்சிக்கு வைக்கிறோம். முள்ளுத் தேன்குழல், சாதா தேன்குழல் கொஞ்சம் போல்! மிக்சர் அது தான் விநியோகத்துக்கு, பாதாம் அல்வா! (சரியா வரலை, கலரும் போடலை!) பயத்தம் லாடு வெல்லம் போட்டு, தீபாவளி மருந்து! வெற்றிலை, பாக்கு, பழம், பூ!    பூ நேத்திக்கு 50 கிராம் 40 ரூபாய். 50 கிராம் வாங்கித் தொடுத்தேன். 

ஏற்கெனவே உடம்பு படுத்தல். அதோடு கிரகப்ரவேசம், இப்போ தீபாவளி. என்றாலும் இம்முறை அதிகம் பக்ஷணங்கள் பண்ண வேண்டாம்னு தான் நினைச்சேன். ஆனால் மிக்சர் பண்ணணும்னு முடிவு செய்ததால் அதுக்கு வேண்டிய தேங்குழல் வகைகள் கொஞ்சம் கொஞ்சம் பண்ணறாப்போல் ஆயிடுத்து! மிக்சருக்குப் பண்ணும்போதே அவற்றில் கொஞ்சம் போல் எடுத்து வைத்துக் கொண்டேன். ஞாயிறன்று தான் பண்ண ஆரம்பிச்சேன். ஆனாலும் இணையத்துக்கு என்னமோ முன்னை மாதிரி வர முடியறதில்லை. ஒரே அசதி! நடுவில் கொஞ்ச நேரம் வந்து பார்ப்பதோடு சரி! நல்லவேளையா இந்த வருஷம் தீபாவளித் துணி வாங்குவது விஜயதசமிக்குனு வைச்சுக்காமல் நவராத்திரிக்கு முன்னாடியே வாங்கிட்டோம். நவராத்திரி நேரத்திலும் போக முடிஞ்சிருக்காது! பின்னரும் போக முடிஞ்சிருக்காது!

வழக்கம் போல் கோ ஆப்டெக்ஸ் தான்! சென்னையின் ஹான்ட்லூம் ஹவுஸ் நினைவில் வருது! அங்கே உள்ள வெரைடி இங்கே இல்லை தான்! ஆனால் சென்னை எழும்பூர் தில்லையாடியில் கிடைக்கும் வெரைடியை விட இங்கே நல்லாவே இருக்கு! கோவை நெகமம் இங்கே நல்லாக் கிடைக்குது. நெகமம் புடைவை ஒண்ணு வழக்கம் போல் எடுத்தேன். எழுபதுகளில் நெகமம் புடைவை இருந்ததுக்கும் இப்போதைக்கும் வித்தியாசம் இருக்கு. ஆனாலும் நெகமம் புடைவைகளின் தரம் மற்றக் கோவைப் புடைவைகளில் இல்லைனே சொல்லணும். ஊரெல்லாம் பட்டாசு வெடிக்கத் தடை அது, இதுனு சொல்றாங்க. ஆனால் இங்கே ஒரு வாரமா அவ்வப்போது வெடிகள் வெடித்துக் கொண்டு தான் இருந்தனர். முந்தாநாளில் இருந்து பட்டாசு சத்தம் ஜாஸ்தி தான். ஆனால் வழக்கமான சப்தத்தை விடக் குறைவுனு ரங்க்ஸோட நினைப்பு. எனக்கு அப்படித் தோணலை. காலையில் ஃபோன் வந்தப்போப் பேச முடியலை! வெடிச் சத்தம். இப்போவும் கொஞ்சம் படுக்கலாம்னு போனால் ஒரே வெடிச் சப்தம்.

இன்னமும் வெடித்துக் கொண்டிருக்கின்றனர். திருநெல்வேலியில் பட்டாசு வெடித்ததுக்குக் கைது பண்ணி இருப்பதாகச் செய்திகள் கூறுகின்றன. இங்கே அப்படி எல்லாம் யாரும் யாரையும் கைது பண்ணக் காணோம்.  ஒருத்தர் ரெண்டு பேரா இருந்தாச் சரி! எத்தனை பேரைனு கைது பண்ணுவாங்க? அதான் போல! அதோட இன்னிக்கு வெடிக்கலைனா அப்புறமா தினம் தினமா வெடிக்கப் போறாங்க? போனால் போகட்டும்னு விட வேண்டியது தான். :)))) பாவம் குழந்தைங்க!

அனைவர் வாழ்க்கையிலும் மங்களம் பொங்கி மகிழ்ச்சியாகவும் ஆரோக்கியமாகவும் இருக்கப் பிரார்த்தனைகள்! தீபாவளி வாழ்த்துகள்!