எச்சரிக்கை

இந்த வலைப்பக்கங்களில் வரும் என்னுடைய பதிவுகளை என் அனுமதி இல்லாமல் யாரும் பயன்படுத்தக் கூடாது. மேற்கோள் காட்டத் தேவை எனில் என் பதிவின் சுட்டியைக் கொடுக்கவேண்டும்.


Not a penny is he going to take with him finally after his lifelong pursuit of money. The Lord's name, Bhagawan nama, is the only currency valid in the other world.

Have a great day.

பரமாசாரியாரின் அருள் வாக்கு

Sunday, November 24, 2019

சில, பல விமரிசனங்களுக்குப் பின்னர் மீனாக்ஷி கோயில் தொடரும்!

பொதுவாக நம் நாட்டில் இருக்கும்போது நான் திரைப்படங்களோ அல்லது நெடுந்தொடர்களோ அதிகம் பார்ப்பது இல்லை. சாயங்காலம் ஒரு ஒன்றரை மணி நேரம் அது என்னவாக இருந்தாலும் பார்த்துத் "தொலைப்பதை" (இஃகி,இஃகி) ஒரு கடமையாக ஆற்றி வருகிறேன். ஆனால் இங்கே வந்தால் அரிய படங்கள், அரிய தொலைக்காட்சித் தொடர்கள் எனப் பார்ப்பேன். பார்ப்பது மத்தியான நேரங்களில் தான். இங்கே மத்தியானம் அதிகம் வேலை இருக்காது. கிடைக்கும் இரண்டு மணி நேரத்தில் அப்படிப் பார்த்த படங்களில் சிலவற்றுக்குத் தான் விமரிசனம் எழுதினேன். அதைத் தவிரவும் ஸ்பெஷல் 26, ரோமியோ,அக்பர், வால்டர், பர்ஃபி, கேசரி ஆகிய படங்கள். இவற்றில் ஸ்பெஷல் 26 சிபிஐ அதிகாரிகளாக நடித்துக் கொள்ளை அடிக்கும் இரு நண்பர்கள் ஆன அஜய் சிங், பி.கே.ஷர்மா ஆகியோரைப் பற்றியும் அவர்கள் கொள்ளை அடிக்கும் விதமும் பற்றி. அஜய்சிங்காக அக்ஷய் குமாரும், பி.கே.ஷர்மாவாக அனுபம் கேரும் நடித்திருக்கிறார்கள். காஜல் அகர்வால் அஜய்சிங் அக்ஷய் குமாரைக் காதலிக்கும் பெண்ணாக வருகிறார்.

special 26 க்கான பட முடிவு

அவரை விளம்பரப் படங்களில் தான் பார்த்திருக்கேனே தவிர்த்து நடித்த படம் எனப் பார்த்தது இது ஒன்று தான். இவர்களைச் சிக்கவைக்கும் சிபிஐ அதிகாரி வாசீம் கானாக வருபவர் மனோஜ் வாஜ்பேய். நன்றாகத் திட்டம் போடுகிறார் தன் கூடவே இருப்பது யார் எனத் தெரியாமல். கடைசியில் அவர் போட்ட திட்டம் எதிராளிகளுக்கு நன்றாகப் பலன் அளிக்க, சிபிஐ குற்றவாளிகளைக் கண்டறியும் வேளையில் பி.கே. ஷர்மாவும், அஜய் சிங்கும் அவரவர் மனைவியுடன் ஷார்ஜாவில் நடக்கும் கிரிக்கெட் விளையாட்டைக் கண்டு களித்துக் கொண்டிருக்கின்றனர். நடக்கும் விஷயம் தான். சொல்லிப் போயிருக்கும் விதம் அருமை. 2013 ஆம் ஆண்டு வெளிவந்திருக்கும் இந்தப் படம் கொஞ்சம் நகைச்சுவைக்காட்சிகளோடு இருக்கிறது. அதிலும் அனுபம் கேர் வரிசையாகக் குழந்தைகள் பெற்றுக் கொள்வது! இஃகி,இஃகி!

romeo akbar walter க்கான பட முடிவு

அடுத்து 2019 ஆம் வருஷம் வெளியான ரோமியோ, அக்பர், வால்டர் படம் கிட்டத்தட்ட "ராஜி" மாதிரித் தான். ஆனால் இங்கே உளவு பார்க்கச் செல்லுவது வங்கி ஒன்றில் வேலை பார்த்து "ரா"வால் உளவு பார்க்கத் தேர்ந்தெடுக்கப்பட்ட ஓர் ஆண்மகன். தந்தை ராணுவ வீரர் ஆனாலும் அவர் தாய்க்கு அவர் ராணுவத்தில் சேர்வது பிடிக்கவில்லை என்பதால் வங்கியில் வேலை பார்த்து வருகிறார். தற்செயலாக அவர் வங்கியில் நடக்கும் ஓர் கொள்ளையை அடக்கப் போய், அந்தக் கொள்ளையே ஓர் நாடகம் என்றும் அவர் உளவாளிப் பயிற்சிக்குத் தக்கவாரா எனப் பார்க்க நடந்தது என்றும் பின்னால் தெரிய வருகிறது. தாயிடம் தான் வேலை நிமித்தம் பயிற்சிக்குப் போவதாகச் சொல்லிவிட்டுக் கிளம்புகிறார். அங்கேயே முழுக்க முழுக்கப் பாகிஸ்தானியாகவே ஆகி விடுகிறார். இதில் ஜான் அப்ரஹாம் ரோமியோவாக வருகிறார். "ரா"வின் தலைமைப் பீடத்தில் ஸ்ரீகாந்த் ராயாக வருபவர் ஜாக்கி ஷெராஃப்.

கதைக்களம் இந்தியாவுக்கும், பாகிஸ்தானுக்கும் எழுபத்தி ஒன்றாம் ஆண்டு நடந்த போர். கிழக்கு வங்காளம் எனப்படும் கிழக்கு பாகிஸ்தான் மக்கள் தங்களை ஆண்ட மேற்கு பாகிஸ்தானில் இருந்து விடுதலை பெற நடத்திய போராட்டத்தின் அடிப்படையில். பாகிஸ்தான் எப்படி இந்தியாவைத் திடீர்த் தாக்குதல் நடத்த முயன்றது என்பதில் இருந்து பங்களா தேஷாக ஆகப் போகும் நாட்டின் மக்களை இந்தியா எப்படி விடுவித்தது என்பது வரை அழகாய்த் திட்டம் போட்டு நடத்துவதைக் காட்டுகிறார்கள். நமக்கு தேசபக்தி அதிகமா? ரத்தம் ஒரே கொதி! அடக்கி வைச்சேன். நல்ல படம். கட்டாயமாய்ப் பார்க்கலாம். புத்தம்புதுப்படம்!

barfi movie க்கான பட முடிவு


barfi movie க்கான பட முடிவு
அடுத்தது பர்ஃபி. 2012 ஆம் ஆண்டில் வந்திருக்கிறது. இதில் வாய் பேசமுடியாத காது கேட்காத இளைஞனுக்கும், ஆடிஸம் நோயால் பாதிக்கப்பட்ட பெண்ணுக்கும் இடையில் ஏற்படும் நேசம். மகத்தானதொரு காவியம். ஆடிஸம் நோயால் பாதிக்கப்பட்ட பெண்ணாக வருபவர் (ஜில்மில் என்னும் பெயர்) ப்ரியங்கா சோப்ரா. ரிஷி கபூரின் பிள்ளை ரன்பீர் கபூர் காது கேட்காத வாய் பேச முடியாத பர்ஃபி. இருவரும் கடைசி வரை ஒன்றாக இருந்து கடைசி நிமிடங்களில் கூடப் பிரியாமல் இருப்பது தான் முக்கியக் கரு. நடுவில் பர்ஃபியைக் காதலிக்கும் (ஒருதலைப்பட்சமாக என்றாலும் பர்ஃபி அந்தக் காதலை அங்கீகரிக்கிறான்.)பெண்ணாக வரும் இலியான டீ க்ரூஸ். அவரும் வங்காளப் பெண்ணாக நன்றாகவே நடிக்கிறார். பணத்துக்காக (ஜில்மில்) மனநிலை சரியில்லாத பெண்ணைக் கடத்தி ஒளித்து வைத்துவிட்டு இறந்து விட்டதாகப் பொய் சொல்லும் பெண்ணின் தந்தையாக வருபவர் ஆஷீஷ் வித்யார்த்தி. எல்லோருமே நன்றாக நடித்திருக்கிறார்கள். ரன்பீர் கபூருக்கு ராஜ்கபூரின் உடல் மொழி நன்றாக வசப்பட்டிருக்கிறது. படம் பார்க்கலாம்.

kesari movie க்கான பட முடிவு

அடுத்து கேசரி. இஃகி,இஃகி, சாப்பிடற கேசரியை நினைச்சால் அதை நிறுத்துங்க. இந்தப் படமும் 2019 ஆம் ஆண்டில் தான் வந்துள்ளது. சீக்கியர்களின் பகடி(தலைப்பாகை)  கேசரி நிறத்தில் இருக்கும். அந்தப் பகடியை மற்றொருவர் தொட விட மாட்டார்கள். இந்தக் கதை ஆரம்பக் கால பிரிட்டிஷ் சாம்ராஜ்யத்தின் ராணுவத்தில் இருந்த சிக் ரெஜிமென்டில் இருந்த சீக்கியர்கள் சிலரைக் குறித்தும் அவர்கள் தலைவன் ஹவில்தார் (இஷார்சிங்காய் நடிக்கும் அக்ஷய் குமார்) பற்றியும் கதை. இந்திய ஆஃப்கன் எல்லைப் பகுதியில் நடக்கும் கதை. ஆஃப்கன் பதான்கள் கூட்டமாக வந்து இவர்களைத் தாக்குவதையும் கோட்டையை எரித்து அழித்து நாசமாக்குவதையும் பார்த்தால் மனம் பதறுகிறது. பதான்கள் எல்லோரையும் கொன்று விட்டாலும் இஷார்சிங்குக்குக் கொடுத்த வாக்கின்படி எந்த சர்தாரின் பகடியையும் தொடவில்லை. பகடியோடேயே அவர்களை விட்டு விடுகிறான். இவர்களின் வீரத்தைக்கேலி செய்யும் ஆங்கிலேய ராணுவ அதிகாரி பின்னால் இவர்களின் வீரத்தை உணர்கிறான். இவர்கள் தியாகத்தால் அருகே இருக்கும் மற்ற இரு கோட்டைகள் காப்பாற்றப்படுகிறது. பிரிட்டிஷ் அரசு பாரளுமன்றத்தில் இவர்களுக்காக2 நிமிடம் மௌன அஞ்சலி செலுத்தியதாகவும் இவர்களுக்கு Indian Order of Merit (equal to விக்டோரியா க்ராஸ்) பட்டம் கிடைத்ததாகவும் சொல்லப்படுகிறது. இது சரித்திரம்.

kesari movie க்கான பட முடிவு

படங்களுக்கு நன்றி கூகிளார்


இப்போது தினம் கொஞ்சம் கொஞ்சமாகப்பார்ப்பது தி க்ரவுன் என்னும் நெடுந்தொடர். தற்போதைய ராணி எலிசபத்தின் கதை! அவர்  உயிருடன் இருக்கும்போதே படமாக்கப்பட்டிருக்கிறது. அதுவும் உண்மை நிகழ்வுகள். ராணியின் திருமணம், கணவர் ஃபிலிப்புடனான வாழ்க்கை, இருவருக்கும் எற்படும் மனத்தாங்கல்கள், ராணியாவதற்கு முன் ஏற்படும் பிரச்னைகள், குடும்பத்தில் ஏற்படும் கோளாறுகள், தங்கை மார்கரெட்டால் அவள் காதலால் ஏற்படும் சிக்கல்கள் என அணு அணுவாக விவரித்திருக்கிறார்கள். ராணியின் முடி சூட்டு விழாவில் ராணியின் கணவர் ஃபிலிப் ராணிக்கு எதிரே மண்டியிட வேண்டும் என்று சொல்லுவதும் முதலில் மறுக்கும் எடின்பரோ கோமகன் பின்னர் எலிசபெத் மனைவியாக இல்லை, இப்போது இது ராணியின் உத்தரவு எனச் சொன்னதும் மண்டி இட்டு வணங்குவதும் அருமை. ஒரு ராணியாக இருப்பது எவ்வளவு கஷ்டம் என்பதும் நிர்வாகம் சுலபம் அல்ல என்பதும், பிரபுக்கள் சபையிலும், சாமானியர்கள் தலைவர்களுக்கும் ஏற்படும் மோதலும் சர்ச்சிலின் மேல் நம்பிக்கை இல்லாத்தீர்மானம் கொண்டு வர அப்போது லண்டனில் ஏற்பட்ட பனியையும் அதன் மூலம் ஏற்பட்ட குழப்பத்தையும் பயன்படுத்திக்கொள்ளும் அரசியல்வாதிகளும்! அருமை என்று சொன்னால் போதாது. என்ன இருந்தாலும் அவங்கல்லாம் இயல்பாகவும் துணிச்சலாகவும் உள்ளதை உள்ளபடிச் சொல்லிப் படம் எடுப்பது போல் நமக்கு வராது! "பொன்னியின் செல்வன்" எல்லாம் நல்லவேளையா எடுக்கலை. பிழைச்சோம். இங்கே உடையிலிருந்து ஆபரணங்கள் வரை எல்லாவற்றையும் நுணுக்கமாகக் கவனித்து எடுத்திருக்கிறார்கள்.

The Crown க்கான பட முடிவு

வெஸ்ட் மினிஸ்டர் அபே, பக்கிங்காம் அரண்மனை எல்லாம் உண்மையானது போலவே அமைப்பு! பிரமிப்பாக இருக்கிறது. நடிப்பும் இயல்பாக வந்திருக்கிறது. அனைவரும் அவரவர் பாத்திரங்களை உணர்ந்து நடித்திருக்கிறார்கள். அரண்மனையின் ஒரு பகுதியில் வசிக்கும் இளவரசி மார்கரெட் இன்னொரு பகுதியில் வசிக்கும் தன் அக்கா ராணி எலிசபெத்தைத் தொலைபேசி மூலம் தொடர்பு கொள்வது அந்தக் காலங்களில் தொலைபேசி இணைப்பை எப்படிக் கொடுத்திருக்கிறார்கள் என்று நமக்குத் தெரியவருகிறது. ராணியின் முடிசூட்டு விழா தொலைக்காட்சியில் (அங்கே அப்போவே வந்திருக்கு) ஒளி பரப்பலாமா என்பதற்கான சர்ச்சை!

The Crown க்கான பட முடிவு

பின்னர் தன் பெரியப்பா வின்ட்சர் கோமகன், (பட்டத்தைக் காதலுக்காகத் துறந்தவர்) எட்வர்ட் பார்க்க வேண்டும் என்பதற்காக ஆர்ச் பிஷப்பிடம் சொல்லி அனுமதி வாங்கும் இடம், தன் பெரியப்பாவுக்கு மட்டும் முடிசூட்டு விழாவுக்கு அழைப்பு அனுப்புவதும், அவர் மனைவிக்கு அழைப்பு அனுப்பாமல் இருப்பதும் கண்டு வருந்துவது, ஆனால் தன்னால் ஏதும் செய்ய முடியாமல் இருப்பது. கடைசியில் வின்ட்சர் கோமகன் தன் மனைவியை மதிக்காத இடத்தில் தனக்கும் வேலை இல்லை என்று சொல்லி முடிசூட்டு விழாவுக்கு வர மறுப்பது! வின்ஸ்டன் சர்ச்சில் லார்ட் மவுன்ட்பேட்டனைச் செய்யும் கிண்டல், "இந்தியாவைக் கொடுக்கும்போது மனைவியையும் சேர்த்துக் கொடுத்துவிட்டான்" என்று சொல்கிறார்.  எதைச் சொல்லுவது! எதை விடுவது! சரித்திரமே அங்கே படமாகிக் கொண்டிருக்கிறது.

Thursday, November 21, 2019

ஹூஸ்டன் மீனாக்ஷி கோயில்! சில படங்கள்!

வந்ததில் இருந்தே மீனாக்ஷி கோயில் போகணும் என்று ஆவல். முக்கியமாய் நூலகத்திற்காக! ஆனால் இப்போது நூலகம் செயல்படுவதாகத்தெரியலை என்று பையர் சொன்னார். அவரும் அங்கே போய் வெகு நாட்கள் ஆகிறது என்றும் சொன்னார். ஸ்வாமிநாராயண் கோயில் தவிர்த்த வேறு கோயில்கள் எங்கும் போக முடியாமல் அவருக்கு அலுவலக வேலை. ஞாயிற்றுக்கிழமைகள் வீட்டைச் சுத்தம் செய்தல், ஒரு வாரத்துணிகளைத் தோய்த்து இஸ்திரி போட்டு வைத்துக்கொள்வது, வீட்டுக்குத் தேவையான சாமான்களை வாங்குவது என இருவருக்கும் வேலை நெட்டி வாங்கும். ஆகவே நாங்க கோயில் போகலாம் என்று கேட்கவே இல்லை. பின்னர் அங்கிருந்து இங்கே பெண் வீட்டுக்கு வந்ததும் கூட உடனடியாக எங்கேயும் போகலை. நவம்பர் 3 ஆம் தேதி மாப்பிள்ளைக்குக் கொஞ்சம் நேரம் கிடைக்கவே மீனாக்ஷி கோயிலுக்குப் போகலாம் எனச் சொல்லி அழைத்துச் சென்றார்கள். சீக்கிரம் கிளம்பணும் என்று சொல்லிக் கிளம்பியாச்சு. பையர் வீட்டிலிருந்தே கோயில் தூரம் அதிகம் என்றால் இங்கே இருந்து இரண்டு மணி நேரம் ஆகிவிடுகிறது.


அங்கேயே சாப்பாடு விற்பதாகவும் திரும்புகையில் அங்கேயே சாப்பிட்டுவிட்டுத் திரும்பலாம் என்றும் ஏற்கெனவே பெண் சொல்லி இருந்தாள். முன்னரும் கொடுத்தாங்க தான். ஆனால் அது அவ்வளவு நன்றாக இருக்காது என்பதுடன் அளவும் குறைவாக இருக்கும். சீக்கிரம் போகலைனா தீர்ந்துடும். இப்போக் கிட்டத்தட்ட உணவு விடுதி மாதிரி நடப்பதாகவும் சொன்னார்கள். நூலகம் குறித்துப் பெண்ணிற்கு ஏதும் தெரியலை என்றாலும் அது திறந்து பார்க்கலை என்றாள். கோயிலுக்குப் போகும்போது அங்கே உள்ளே சந்நிதியில் யாரோ ஹோமம் ஏற்பாடு செய்து நடந்து கொண்டிருந்தது. அங்கே இருந்த வைதிகர்களில் பட்டர், குருக்கள் ஆகியோரும் இருந்திருக்கலாம். ஆனால் தெரிந்த பட்டரைக் காணோம். குருக்கள் ஒருத்தரும் கும்பகோணம் பக்கத்துக் கிராமத்தில் இருந்து அங்கே வந்திருந்தார். அவரையும் காணோம். நாங்க முதலில் சுந்தரேசரைத் தரிசனம் செய்து கொண்டு மீனாக்ஷி சந்நிதிக்கு வந்தோம். கோயிலில் கூட்டம் அதிகம் தான். ஞாயிற்றுக்கிழமை என்பதாலும் ஹோமம் நடந்ததாலும் கூட்டம் என்று நினைத்தேன்.




ஆதியில் குடி வந்த பிள்ளையார் கோயிலின் அருகே உள்ள கார் பார்க்கில் இருந்து கோயில் செல்லும் வழி! :)





மக்கள் நடமாட்டம் அதிகம் இருந்ததால் அவர்கள் ஆக்ஷேபிக்கா வண்ணம் படங்கள் எடுக்க வேண்டி இருந்தது.


இவர் தான் முதல்லே வந்திருக்கார். வந்து மத்தவங்களைக் கூட்டி வந்திருக்கார். இப்போக் குடும்பமே இங்கே தான் பிழைப்பு! :))))


மீனாக்ஷி, சுந்தரேசர் எல்லோரையும் படங்கள் எடுத்திருக்கேன் தான். ஆனால் மக்கள் அதிலே நிறைய இருப்பதால் பகிர்வது கடினம். கூடியவரையிலும் யாரும் இல்லாத படங்களாகத் தான் போடணும். தரிசனம் எல்லாம் முடிச்சுத் திரும்புகையில் நூலகம் பற்றி விசாரித்ததில் இப்போது செயல்படவில்லை என்றும் இருக்கு என்றும் சொன்னார்கள். ஆனால் அந்தப் பக்கமே யாரும் போகலை. நாங்க சாப்பாட்டு ராமர்களாக அதுக்குள்ளே மணியும் பனிரண்டரை ஆகி விட்டதால் நேரே சாப்பிடப் போனோம். உணவு ஆர்டர் கொடுத்ததும் டோக்கன் கொடுத்துவிட்டுத் தயார் ஆனதும் கூப்பிடுவார்களாம். பெண்ணும், மாப்பிள்ளையும் போய் வேண்டியதைச் சொல்லி வாங்கி வந்தார்கள். நான் ரொம்பவே பயத்துடன் முன்னெச்சரிக்கை நடவடிக்கையாக இட்லி, தயிர் சாதம் சொன்னேன். நம்ம ரங்க்ஸ் புளியஞ்சாதம், தயிர் சாதம் சொன்னார். நான் காரம் வேண்டாம் என்பதால் தவிர்த்தேன். அதோடு அவ்வளவு சாப்பிடவும் முடியாது.


பெண், மாப்பிள்ளை, அப்பு மூணு பேரும் அவங்கவங்களுக்குப் பிடிச்ச தோசை வாங்கிக்கொண்டார்கள். எல்லாமும் சாப்பிடும்படி இருந்தது. முக்கியமாய் இட்லி, சாம்பார், சட்னி, தயிர்சாதம். தொட்டுக்கக் கொடுத்த ஊறுகாய் தான் ரொம்பக் காரம். எண்ணெயே விடலை! ஆனாலும் கொஞ்சமாய்த் தொட்டுக் கொண்டு சாப்பிட்டோம். வத்தக்குழம்பு சாதத்தைப் புளியஞ்சாதம்னு கொடுத்திருக்காங்க என்றாலும் சாப்பிடும்படி இருந்தது. அதே போல் பெண்ணின் ரவா தோசை, மாப்பிள்ளையின் மைசூர் மசாலா, அப்புவின் பூரி, கிழங்கு எல்லாமும். ஏற்கெனவே இந்த உணவு விடுதி பற்றிப் படித்தேன். அக்கம்பக்கம் சுற்றுவட்டார ஊர்களில் இருந்தும் உள்ளூரில் இருந்தும் விடுதியில் வசிக்கும் இளைஞர்கள், இளம்பெண்கள் இங்கே வந்து உணவு குறைந்தது நான்கு நாட்களுக்கு வாங்கிச் சென்று விடுவார்களாம். அதை நேரிலும் பார்த்தேன். இங்கே தான் ஃப்ரீசரில் வைத்துவிட்டுப் பின்னர் மைக்ரோவேவில் வைத்துச் சூடு செய்து சாப்பிடுகிறார்கள் என்பதால் அதற்கு இது வசதியா இருக்கு என்பதோடு மற்ற ஓட்டல்கள், உணவு விடுதிகளை விட விலையும் குறைவு.



ஐயப்பன் சந்நிதியின் பதினெட்டாம்படி. இப்போத் தான் சில வருடங்களாக இருக்குனு சொன்னாங்க. சென்ற முறை 2016/17 ஆண்டில் அம்பேரிக்க விஜயத்தின் போது கோயில்களுக்குச் செல்லக் கூடாதுனு என எங்கேயும் போகாமல் இருந்துட்டோம். ஆகவே எப்போ இது வந்ததுனு தெரியலை. சபரிமலையில் இருக்கிறாப்போல் வடிவமைத்திருப்பதாகச் சொல்கின்றனர். நம்மவரும் ஆமாம் என்றார்.


பையர், மருமகள் உடம்பு சரியில்லை என்பதை அவங்க முதலில் சொல்லவே இல்லை. ஒண்ணும் செய்தி இல்லையேனு நாங்களாகத் தொலைபேசியில் விசாரித்தபோது தான் சொன்னார்கள். இங்கே அப்புவின் பள்ளியில் பிரச்னை என்பதால் நாங்க கொஞ்சம் கலக்கத்துடன் இருந்தோம். யாரோ எட்டாம் வகுப்பு மாணவர்கள் இருவரை அவர்கள் நடத்தையின் காரணமாகப் பள்ளியை விட்டுத் தாற்காலிகமாக நிறுத்தி இருந்ததால் துப்பாக்கிச்சூடு எப்போ வேணா நடக்கலாம் என்று சொல்லிக் கொண்டிருந்தார்கள். முதலில் இது வதந்தியாக இருக்கலாமோ என்று யாரும் எதுவும் பேசாமல் இருந்தோம். பின்னர் பள்ளியில் இருந்தே பெற்றோருக்கு எச்சரிக்கைக் கடிதம் இமெயிலில் வரவே கொஞ்சம் கலக்கம் தான். காவல்துறை பாதுகாப்புப் போட்டிருக்காங்க. இன்னமும் அதை நீக்கவில்லை. அதோடு பள்ளிக்குழந்தைகளைப் பள்ளி வான் போலவே ஏற்பாடு செய்து அதில் வைத்துக் கடத்துவார்கள் என்றும் பேசிக்கொண்டார்கள். இது எதுவும் உண்மையாக இருக்கக் கூடாதே என்றே நாங்கள் பிரார்த்தித்துக் கொண்டிருந்தோம். இப்போது நிலைமை சீரடைந்து வருகிறது. குழந்தை வழக்கம் போல் பள்ளிக்குச் சென்று வருகிறாள்.  இந்த விஷயம் உள்ளூர்த் தினசரிச் செய்திகளிலும் முகநூலிலும் வந்திருக்கிறது என்பது தெரிந்ததும் தான் நானும் இங்கே பகிர்ந்திருக்கிறேன். ஒரு சில பெற்றோர்கள் பகிர்ந்திருக்கின்றனர்.

Tuesday, November 19, 2019

ஹூஸ்டனில் இந்திய ஓட்டல்கள்! "திங்க"ற கிழமைக்கு ஒரு பதிவு!

பொதுவாகவே இப்போ இந்தியாவிலும் அதிலும் தமிழ்நாட்டில் ஓட்டல்கள் சாமானியர்களால் சாப்பிட முடியாத அளவுக்கு விலை உயர்வுடனும் தரமற்றும் காணப்படுகிறது. இதுக்குச் சில ரோட்டோரக் கடைகளும், மெஸ் எனப்படும் சின்னஞ்சிறு ஓட்டல்களும் ஓரளவுக்குச் சாப்பிடும்படி இருக்கும். இங்கே அம்பேரிக்காவிலும் பல இந்திய ஓட்டல்கள் உள்ளன. இங்கே பதினைந்து வருஷங்களுக்கு முன்னே வர ஆரம்பிச்ச போதில் இருந்து பல ஓட்டல்களுக்கும் போய்ச் சாப்பிட்டுப் பார்த்திருக்கோம். பெரும்பாலும் இங்கே இந்திய உணவுகளைச் சமைப்பவர்கள் ஸ்பானிஷ் பேசும் மெக்ஸிகன்கள் தான். அவர்களுக்குச் சொல்லிக் கொடுத்துச் செய்ய வைத்திருக்கின்றனர். ஆனாலும் வட இந்திய ஓட்டல்களின் உணவு பரவாயில்லை எனச் சொல்லும்படித் தென்னிந்திய உணவுகள் இருக்கின்றன. தோசையை முறுகலாக வார்ப்பதாக நினைத்துக்கொண்டு தூள் தூளாக வரும்படி விறைப்பாக வார்த்துவிடுகிறார்கள். ஒரு பக்கம் ரப்பர் மாதிரி இழுக்கும். இன்னொரு பக்கம் நொறுங்கும். தொட்டுக்கக் கொடுக்கும் கண்ணராவி வட இந்திய ஓட்டல்களில் தக்காளிச் சாறில் மிளகாய்த் தூள், உப்புச் சேர்த்து வெங்காயத்தை வதக்கிப் போட்டிருப்பார்கள் சாம்பார் என்னும் பெயரில்! தக்காளிச் சட்டினி கொஞ்சம் பரவாயில்லை ரகம். தேங்காய்ச் சட்டினி கேட்கவே வேண்டாம். பச்சைத் தேங்காயை உடைத்துச் செய்யும் சட்டினியே பல சமயங்களில் இங்கே சுமாராக இருக்கும். தேங்காயின் தரம் அப்படி! பெரும்பாலான ஓட்டல்களில் காய வைத்த தேங்காய்ப் பவுடரிலோ ஃப்ரோசன் தேங்காய்ப் பவுடரிலோ செய்யறாங்க. அது இன்னும் சுத்தம்.

ஆனால் இங்கே அதையும் நல்லா இருக்குனு சொல்லிச் சாப்பிடுபவர்கள் அதிகம். இந்த அழகில் எங்களை எல்லாம் ஓட்டலுக்குக் கூட்டிப் போனால் கூட்டிச் செல்லுபவர்கள் பாடு திண்டாட்டம். பையர் இதைக் கண்டுக்கவே மாட்டார். பொண்ணு நல்ல ஓட்டலுக்குக் கூட்டிப் போகிறோம் என்று முதலில் ஓர் குஜராத்தி ஓட்டலுக்குக் கூட்டிச் சென்றாள். நான் சாமர்த்தியமாகச் சாப்பிடுவதாக நினைத்துக்கொண்டு தயிர் வடையும், கசோடியும் சொன்னேன். கசோடிக்குப் பதிலாக மேதி போண்டா மாதிரிப் போட்டுக் கொண்டு வைச்சுட்டாங்க. க்ர்ர்ர்ர்ர்ர்ர்ர்ர்! தயிர் வடையில் தயிர் புளிப்போ புளிப்பு! அதையும் போனால் போகிறது என்று சாப்பிட்டு வைத்தேன். நம்மவர் சனா படூரா வாங்கிக் கொண்டு தப்பித்துவிட்டார். எனக்கு அது அவ்வளவாப் பிடிக்காது. கொண்டைக்கடலையில் பூண்டு சேர்த்துப் பண்ணி இருப்பாங்க. இந்த அழகில் இருக்கு எல்லா ஓட்டல்களும். அதனால் பொண்ணு எங்களை சரவணபவன் ஓட்டலுக்குக் கூட்டிச் சென்றாள் போன வாரம்.





அங்கே நம்ம ஊர் மினி டிஃபன் மாதிரி 2,3 கலவை மினி டிஃபன்கள் இருந்தன. அதில் முதல் பட்டியலில் இட்லி 1, மசால் தோசை 1, கிச்சடி, ஸ்வீட் என இருந்தது. இன்னொன்று இட்லி, பொங்கல், வடை, ஸ்வீட், அடுத்தது தோசை சாதா ஒன்று, ஒரு இட்லி, ஒரு வடை! என இருந்தது. நான் கொஞ்சம் வயிறு நிரம்பணுமே என்பதால் பட்டியலில் முதலாவதைத் தேர்ந்தெடுத்தேன். நம்மவர் எப்போப் போனாலும் மசால் தோசை தான். அல்லது மைசூர் மசாலா. மாப்பிள்ளை அடை, அவியல் வாங்கிக்கொள்ளப் பென்ணும், அப்புவும் தோசை வாங்கிக் கொண்டார்கள். எல்லாவற்றுக்கும் முன்னால் எனக்கு வந்துவிட்டது. பொதுவாக மற்ற ஓட்டல்கள் போனால் இம்மாதிரி கலந்து கட்டிய டிஃபன் எனில் ஒவ்வொன்றும் பண்ணி எடுத்துவர நேரம் ஆகும். ஆனால் இங்கே முதலில் வந்ததோடு அல்லாமல் வரும்போதே இட்லி மேல் ஊற்றிய சாம்பாரைக் கொட்டித் தட்டெல்லாம் ஆக்கிக் கொண்டு வந்தார் அந்த ஊழியர். அதையும் முன்னால் உட்கார்ந்திருக்கும் என்னிடம் உங்களுக்கானு கேட்காமல் கடைசியில் உட்கார்ந்திருந்த நம்மவரைக் கேட்டார் உங்களுக்கானு.

 கூடவே இன்னொரு கையில் சாதா தோசை அப்புவுக்கு. நாங்க இரண்டு பேரும் எங்களுக்குனு சொன்னதும் கொண்டு வந்து வைச்சார். தொட்டுப் பார்த்தால் ஜில்ல்ல்ல்ல்ல்ல்ல்ல்ல்ல்ல்ல்ல்ல்ல்ல்ல்லோ ஜில்! எனக்குத்  தான் அப்படின்னால் அப்புவுக்கும் அப்படியே! வேறே என்ன செய்யறது? நம்ம ஊரானால் நான் ஒரு பிடி பிடிச்சிருப்பேன். இங்கே இவங்கல்லாம் ஏதேனும் நினைச்சுக்கப் போறாங்கனு வாயைத் திறக்காமல் கிடைச்ச கொஞ்சூண்டு இடைவெளி வழியாக அந்த உணவைத் தலை எழுத்தேனு சாப்பிட்டேன். இட்லி மட்டும் பரவாயில்லை ரகம். கிச்சடியில் வெறும் ரவையை வெந்நீரில் கொதிக்க வைத்து(மறக்காமல் உப்புச் சேர்க்காமல்) மஞ்சள் பொடி மட்டும் போட்டு வைச்சிருந்தாங்க கிச்சடி என்னும் பெயரில். மருந்துக்குக் கூட ஒரு காயும் இல்லை. அடுத்து மசால் தோசை. ரப்பர் எனில் உள்ளிருந்த மசாலாவில் வெறும் உருளைக்கிழங்கை வேக வைத்து அதிலும் உப்பு இல்லாமல் வைச்சிருந்தாங்க.ஓட்டலில் உப்பே வாங்க மாட்டாங்களோனு நினைச்சேன். ஸ்வீட் என்னும் பெயரில் இருந்த கேசரி பரவாயில்லை ரகம் என்றாலும் அதில் ஊற்றி இருந்த எண்ணெய் சாப்பிட விடலை.

நம்மவருக்கும் அதே மசாலாவை வைத்து தோசை வர தோசையை ஒரு மாதிரி சாப்பிட்டு வைத்தார். பொண்ணுக்கு அவள் கேட்ட ரவாதோசை வந்தது. ஆனால் ஆறிப்போயிருந்தது. மாப்பிள்ளைக்கு அடை என்னும் பெயரில் இட்லிமாவில் கடலைமாவைச் சேர்த்து மிளகாய்ப் பொடி போட்டு நினைவாக உப்புச் சேர்க்காமல் இரண்டு தோசைகள் வார்த்து வந்தன. அவியல் என்னும் பெயரில் ஒரே ஒரு முருங்கைக்காயும், ஒரு துண்டம் பூஷணிக்காயும் போட்ட மோர்க்குழம்பு மஞ்சளாக ஓடிக் கொண்டிருந்தது தட்டில். அங்கிருந்த சூபர்வைசரிடம் கூப்பிட்டுச் சொன்னோம்.சூபர்வைசர் விசாரிக்கிறேன் என்று சொன்னார். ஆனால் வேறே ஒண்ணும் கவலைப்பட்டுக்கலை அவர். வேறே வழியே இல்லை. காஃபி நல்லா இருக்கும், குடினு பொண்ணு உபசாரம் பண்ண, நான் பயத்துடன் வேண்டாம்னு சொல்லிட்டேன். மத்தவங்க குடிச்சாங்க! அடைக்கு வேணாப் பைசாக் கழிச்சுக்கறோம்னு சொல்லிட்டு அதுக்கு மட்டும் பில் போடாமல் பில் கொடுத்தாங்க. இப்படியாகத் தானே பிரபலமான சரவணபவனாக இருந்தால் என்ன? எதுவாக இருந்தால் என்ன? இப்படித் தான் இருக்கும் என்று புரிந்தது.

மீனாக்ஷி கோயிலுக்கு 3 ஆம் தேதி போனோம். அது பற்றி விரைவில் எழுதறேன். கொஞ்சம் கொஞ்சம் படங்களுடன் எழுதுவேன்.  இன்னிக்கு இங்கே "திங்க"க்கிழமை இன்னமும் முடியலை. ஆதலால் "திங்க"ற பதிவு போட்டுட்டேன். செரியா? :)))))