மகாகவிக்கு அஞ்சலி!

நேத்திக்கு மருத்துவரிடம் போனதில் நேரம் ஆகிவிட முன் கூட்டியே பாரதியாருக்கான பதிவைத் தயார் செய்து ஷெட்யூல் பண்ண முடியலை. அவசரப் பதிவு!














இன்னிக்குக் குட்டிக் குஞ்சுலுவுக்கு 2 ஆம் பிறந்த நாள். அதோடு பாரதியாரின் நினைவுநாளும் சேர்ந்து கொள்ள அவர் பாடலையே இங்கே குட்டிக் குஞ்சுலுவின் பிறந்த நாளுக்கும் பகிர்ந்துள்ளேன். கீழே இருக்கும்   கடைசிப் படம் குட்டிக் குஞ்சுலுவின் பிறந்த நாளுக்கானது.

அடுத்துச் சென்றது பரவாக்கரை!

பரவாக்கரை!   இந்தச் சுட்டியில் க்ளிக் செய்து பரவாக்கரை பற்றிய தகவல்களைப் படித்துக் கொள்ளலாம்.

கருவிலி கோயிலில் குருக்களிடம் ஏற்கெனவே நாங்க தயிர்சாதம் பிரசாதம் வேணும்னு சொல்லி இருந்ததால் அதை நாங்க கொண்டு போன டப்பாவில் போட்டுக் கொண்டோம். வீட்டிலிருந்தே ஊறுகாய் எடுத்துச் சென்றிருந்தோம். சாதாரணமாகப் பிரசாதமாகச் சாப்பிடுகையில் ஊறுகாய் எல்லாம் போட்டுக் கொண்டு சாப்பிடக் கூடாது! அது தெரியும். ஆனால் நாங்க மதிய உணவாகவே அதை எடுத்துக்க நினைச்சதால் ஊறுகாய் கையோடு கொண்டு போயிட்டோம். :( ப்ரவாக்கரைக்குக் கருவிலி வழியாகச் சென்றால் முட்டையாறு அல்லது முட்டாறூ என்னும் ஆற்றைத் தாண்டித் தான் போகணும். முன்னே எல்லாம் மாட்டு வண்டியில் கருவிலியில் மாமனார் வீட்டிலிருந்து போவோம். அப்போ முட்டையாறு வந்தால் ஆற்றில் வண்டி இறங்கிப் பின் எதிர்க்கரையில் மேலே ஏறும். ஆகவே நாங்க வண்டியில் இருந்து இறங்கி ஆற்றுக்குள் நடந்து போய்த் தான் கரை ஏறணும். தண்ணீர் வந்துட்டாக் கேட்கவே வேண்டாம். ஒரே ஒரு சின்ன மதகு! அதன் வழியாகப் போவதற்குள் போதும் போதும்னு ஆயிடும். என்றாலும் அப்படியும் போயிருக்கோம். கருவிலியில் வீட்டிலேயே மாவிளக்குக்கு மாவு இடித்துக் கொண்டு கலந்து வைத்துக் கொள்வோம். பின்னர் அபிஷேக சாமான்கள், மாவிளக்கு, தேங்காய், வெற்றிலை பாக்கு, பழம், பூ எனத் தூக்கிக் கொண்டு வண்டியில் வைத்துவிட்டு மாமியார், நான், கடைசி நாத்தனார், கடைசி மைத்துனர், எங்க குழந்தைங்க ஏறுவோம். காலை மடித்துக் கொண்டு வண்டியில் உட்காருவது ஒரு வித்தை! என்றாலும் வெயிலில் ஒன்றரை மைல் நடப்பதற்கு அது தேவலை எனத் தோன்றும். முட்டையாறு வரும்போது குழந்தைகளை மட்டும் வண்டியில் விட்டு விட்டு நாங்க கீழே இறங்கி நடக்க ஆரம்பித்தா ரெண்டும், அம்மா பாசம் அதிகம் ஆகிக் கத்த ஆரம்பிக்கும். வண்டியோடயே போவேன். :) வண்டியை ஆட்கள் வந்து கரையில் மேலே ஏத்துவாங்க. இப்போதெல்லாம் சுமார் 20 வருடங்களுக்கும் மேலாக இதெல்லாம் இல்லை. :)

நடு நடுவில் நம்ம கதை வந்துடுது. சொல்ல வேண்டாம்னாலும் இப்போதைய மக்களுக்கு இப்படியெல்லாம் நடந்திருக்குனு தெரிவிக்கணும்னும் நினைச்சுச் சொல்லிடறேன். அடுத்துப் போனது பரவாக்கரைப் பெருமாள். இப்போதைய படத்தில் உற்சவர் அர்த்த மண்டபத்தினுள் ஓர் கூண்டுக்குள் இருக்கார். முன்னர் இருந்த கோலம் பழைய படம் கீழே போட்டிருக்கேன்.



பெருமாள்  இந்தச் சுட்டிக்குப் போனால் பெருமாள் பற்றிய முழுத் தகவல்களும் அறியலாம். அங்கேயே 2,3 சுட்டி இருக்கின்றது. அவற்றைக்  க்ளிக் செய்து விரும்பியவர்கள் படிக்கலாம்.




வலக்கைச் சக்கரத்தோடு உடைந்த நிலையில் பெருமாள். இவர் திரும்பக் கிடைத்த தகவல் தெரிந்ததும் போய்ப் பார்த்தப்போ எடுத்த படம்! பெருமாளைத் தூக்கிட்டுப் போய் ஒளிச்சு வைக்கும்போது கையில் உடைந்திருக்கிறது. இதைச் சரி செய்யப் போராடிக் கொண்டிருக்கோம். சரி செய்து விட்டுப் பெருமாளுக்கு கருடசேவை நடத்திப் பார்க்க ஆசை! எப்போ நிறைவேறும் எனத் தெரியவில்லை. கருடன் தயாராக இருக்கிறார்.



நாச்சியார்கள்




இதில் இருந்து புதிதாய் எடுத்த படங்கள்.

பெருமாள் மட்டும் தெரிகிறார். நாச்சியார்கள் தெரியலை. உள்ளே போக முடியலை! :)

மாரியம்மன் கோயில் குளம்

இம்முறை நாங்க அபிஷேகம் எனச் சொல்லவில்லை. ஆனாலும் எங்க தாயாதி தனக்குப் பேத்தி பிறந்திருப்பதால் அபிஷேகத்துக்குக் கொடுத்திருந்தார். அது நடந்து கொண்டிருந்தது. சரியாக சந்தன அபிஷேகத்தின்போது போய் விட்டோம். பின்னர் அர்ச்சனைகள் முடிந்து தீப ஆராதனைகள் முடிந்து சர்க்கரைப் பொங்கல் சுடச் சுடக் கிடைத்தது. இரண்டாம் முறையும், (பக்கினு நினைச்சிருப்பாரோ? நினைச்சுக்கட்டும்) கேட்டு வாங்கிக் கொண்டு சாப்பிட்டேன். பின்னர் அங்கிருந்து எங்க குலதெய்வம் ஆன மாரியம்மன் கோயிலுக்குச் சென்றோம். மாரியம்மனுக்கும் எங்க தாயாதியே அபிஷேகம் அன்று செய்வித்ததால் அவர் குடும்பமும் எங்களுடன் வந்தனர். எல்லோரும் அபிஷேகத்தைப் பார்த்து அம்மன் அலங்காரம் முடிந்து அர்ச்சனை செய்து கொண்டு பஞ்சாமிர்தப் பிரசாதம் வாங்கிக் கொண்டோம். பூசாரியிடம் கேட்டு அர்த்த மண்டபத்துக்குள் போகாமல் வெளியே இருந்தே அம்மனைப் படம் எடுத்தேன். மாரியம்மன் கோயில் குளத்தில் தண்ணீர் நிறையவே வந்து விட்டது. அதையும் எடுத்துக் கொண்டேன். அங்கிருந்து நாங்க சென்ற இடம் பரவாக்கரையிலேயே மாரியம்மன் கோயிலுக்குக் கிழக்கே! 

செல்லும் வழியில் பச்சைக்கம்பளம் விரித்தாற்போல் வயல் காட்சி அளிக்க அதைப் படம் எடுத்துக் கொண்டேன். சில வயல்கள் முதல் போகம் முடிந்து அடுத்த போகத்துக்குக் காத்திருந்தன. அவற்றையும் நாங்க சென்ற சாலையையும் படம் எடுத்தேன். அங்கெல்லாம் சாலை சரியாக இல்லை. இரு பக்கமும் வயல்கள் . ஆகவே வயலுக்கு வேலைக்குச் செல்வோருக்காகப் போடப்பட்ட மண் சாலை தான். அதிகம் அகலம் எல்லாம் இல்லை. வண்டி செல்லக் கஷ்டமாகவே இருந்தது. ஒரு இடத்தில் நிறுத்தி விட்டு மேலே நடந்து சென்றோம். எங்கள் தாயாதியான ஸ்ரீமத்யார்ஜுன ஐயரும் கூட வந்தார். 

நாளை எங்க ஆவணி அவிட்டம் என்பதால் காலை வர முடியாது. நாளைக்கு எங்கள் ப்ளாகில்   அதிரடியோட கதை வெளிவருது போல. :) மத்தியானம் தான் வர முடியும். 

கருவிலிக்குச் சென்ற விபரங்கள் 2 இது புதுசுங்க!

எப்போவும் அவசரம் அவசரமாகப் போய் தரிசனம் செய்தேன்னு பெயர் பண்ணிக்கொண்டு வருவோம். மாவிளக்குப் போடுவது ஒன்றே முக்கியமாக இருக்கும். சாவகாசமாப் பார்த்தே எத்தனையோ வருஷங்கள். இம்முறை ரொம்பவே நிதானமாப் பார்க்க முடிஞ்சது. அவசரம் இல்லாமல் ஒவ்வொரு சந்நிதியும் ரசிச்சு ரசிச்சுப் பார்த்தேன். 

பிள்ளையாரிடம் இருந்து திரும்பினோமானால் பிரகாரத்தின் மதில் சுவரில் தூண்களுக்கு இடையே சிற்ப அற்புதங்கள் காணலாம். இவர் அர்த்தநாரீசுவரர்! இந்தக் கோயில் ராஜ ராஜ சோழன் காலத்துக்கு முந்தையது எனச் சொல்கின்றனர். அப்போதைய வழக்கப்படி கருவறைக்கு மேல் விமானமே பெரிதாக வெளியே பார்த்தால் தெரியும்படி கட்டி இருந்திருக்கின்றனர். இப்போதைய ராஜகோபுரம் கட்டிப் பதினைந்து வருடங்களுக்குள் தான் ஆகிறது. பிற்காலச் சோழர் காலத்திலும், பிற்காலப் பாண்டிய, விஜயநகர, நாயக்கர் காலத்திலும் கட்டப்பட்ட கோயில்களில் தான் ராஜகோபுரம் மிகப் பெரிதாக அமைக்கப்படும் முறை தோன்றி இருப்பதாகத் தெரிய வருகிறது. தென்காசி சிவன் கோயில் ராஜகோபுரம் அப்படிப் பாண்டியனால் கட்டப்பட்ட ஒரு கோயில் ஆகும். மதுரை மீனாக்ஷி கோயில் நாயக்கர் காலத்தில் சீரமைக்கப்பட்டது! கருவறை விமானத்தை விட ராஜ கோபுரம் பெரியதாகக் காணப்படும்.

நம்ம ஆள் ஒருத்தர் இங்கேயும் உட்கார்ந்திருக்கார். அவரை விடுவோமா! பிடிச்சு வைச்சாச்சு!

தக்ஷிணாமூர்த்தி! என்ன அழகான கலைவடிவுடன் கூடிய சிற்பம்! இப்போதைய சிற்பங்களில் இத்தகைய அழகு காணமுடியாத ஒன்று.

இவரை எல்லோரும் நிறையத் தரம் பார்த்திருப்பீங்க! நம்ம ரங்க்ஸோட விளையாட்டுத் தோழர். சின்ன வயசில் பள்ளிக்குப் போகும் முன்னர் இவருக்கு எண்ணை முழுக்காட்டிவிட்டுப் பக்கத்திலே இருந்த வீட்டுத் தோட்டத்திலே இருந்து பூக்கள் பறித்து வந்து இவருக்குச் சூட்டிவிட்டுக் கற்பூராதிகள் காட்டிவிட்டு விளக்கும் ஏற்றி வைத்துவிட்டுப் போவாராம். இப்போவும் யாரோ அதைத் தொடர்ந்து செய்வதைப் பார்த்து ரொம்பவே சந்தோஷம் அடைந்தார். 

சொல்லவே வேண்டாம், கோஷ்டத்தில் சிவன் சந்நிதிக்குப் பின்னால் விஷ்ணுவும் பிரம்மாவும் இருப்பார்கள் என்னும் நியதிக்கு ஏற்ப இருவரும் இருக்கின்றனர். 

துர்கை அம்மன், எதிரே சண்டேஸ்வரர்

சண்டேஸ்வரர்

சர்வாங்க சுந்தரி! அம்பாள் மிக உயரமானவள். இவளுக்கு ஒன்பது கஜம் புடைவை கூடச் சில சமயங்களில் பத்தாது. அபிஷேகத்துக்கு முன்னர் எடுத்த படம். உள்ளே அர்த்த மண்டபத்தில் என்னால் ஏற முடியவில்லை. அம்பாள் உயரமான இடத்தில் இருக்கிறாள். அவளை விட ஈசன் சந்நிதி கொஞ்சம் தாழ்வாகவே இருக்கும்.  முன்னெல்லாம் கோயில் பாழடைந்து கிடந்ததுக்கு இதுவும் ஒரு காரணம் என்பார்கள். இப்போவும் ஈசன் சந்நிதி கொஞ்சம் தாழ்வாகத் தான் இருக்கிறது. அதே மாதிரி! அம்பாள் சந்நிதிக்குக் கொஞ்சம் படிகள் ஏறித்தான் மேலே போகணும்! ஒரு வேளை இந்தக் கோயில் பின்னால் வந்திருக்கலாமோ என்று ஒரு சந்தேகம். 

பக்கத்தில் அம்மன்குடி என்னும் ஊர் இருக்கிறது. அங்கே இருந்து தான் அம்பாள் ஈசனைத் திருமணம் செய்து கொள்ளும் முன்னர் சர்வாங்கமும் அலங்கரித்துக் கொண்டு சர்வாங்க சுந்தரியாக இங்கே வந்தாள் எனவும் மணப்பெண் அலங்காரத்தில் இருப்பதால் உயரமான இடத்தில் அனைவரும் பார்க்கும்படி காணப்படுகிறாள் என்றும் சொல்கின்றனர். இது குறித்த மேலதிகத் தகவல்களைப் பின்னர் விரிவாகப் பார்க்கலாம்.

அபிஷேகம், அலங்காரம் ஆகி தீபாராதனைக்கு முன்னர் அம்பிகை! கொஞ்சம் சரியா வரலை தான். பின்னால் விளக்கு ஒளி என்பதோடு அர்த்த மண்டபத்திற்குள் என்னால் ஏறிப் போய்ப் படம் எடுக்க முடியலை! அதோடு அர்த்த மண்டபத்துக்குள் எடுப்பதைத் தடையும் செய்திருக்கின்றனர். இது எடுத்ததே பெரிய விஷயம்!குருக்கள் ஏதேனும் சொல்வாரோ என பயமாகவே இருந்தது. 

 யம தீர்த்தம். இந்தக் கோயிலுக்கு எதிரே அமைந்துள்ளது. இந்தக் குளத்தில் ஒரு காலத்தில் கனுவன்று வந்து கனுப்பொடி வைத்து விட்டுக் குளித்திருக்கிறோம். திரு கிருஷ்ணமூர்த்தி (விகே அவர்கள்) அவர்களின் பாட்டனார் செய்த அன்னதானத்தில் பரிமாறப்பட்ட நெய் சேர்த்த உணவைச் சாப்பிட்ட எல்லோரும் கை அலம்பி அலம்பி இந்தக் குளமே நெய்க்குளமாகக் காட்சி அளித்ததாகச் சொல்கின்றனர்.

இங்கிருந்து அடுத்து பரவாக்கரை சென்றோம். அங்கே முதலிலேயே பெருமாள் கோயிலை அடைந்தோம். நாங்க ஏற்கெனவே அபிஷேகம் பூர்த்தி செய்துவிட்டதால் அபிஷேகம் ஏற்பாடு செய்யவில்லை. ஆனால் அங்கே அபிஷேகம்!

இம்முறை தலைப்பை மாற்றி இருக்கேன் கொஞ்சமா! ஆகவே படித்த பதிவுனு நினைக்க வேண்டாம். :)

கருவிலிக்குச் சென்று வந்தோம்!

கருவிலி சர்வாங்கசுந்தரி சமேத சற்குணேஸ்வரருக்கு அபிஷேக ஆராதனைகள் செய்வதற்குப் பிரார்த்தித்து இருந்தோம். அதைப் பூர்த்தி செய்ய சென்ற வாரம் 30 ஆம் தேதி தான் முடிந்தது. அன்று காலை ஏழரைக்குள்ளாக வரும்படி குருக்கள் சொல்லி இருந்ததால் முதல்நாளே தேவையான பூக்கள், மாலைகள், அம்மனுக்கும் சற்குணேஸ்வரருக்கும் ஆன வஸ்திரங்களை வாங்கித் தயார் செய்து கொண்டு வியாழன் அன்று காலை நான்கு மணிக்கெல்லாம் ஸ்ரீரங்கத்தை விட்டுக் கிளம்பிட்டோம். வழக்கம் போல் கையில் இட்லி, காஃபி எடுத்துக் கொண்டோம். மதியத்துக்குக் கோயிலில் தயிர் சாதம் பிரசாதம் கேட்டிருந்ததால் அங்கே வாங்கிச் சாப்பிட்டுக்கலாம் என்பது எண்ணம். கூடியவரை வெளியில் சாப்பிடுவதைத் தவிர்க்கலாம் என்பதே முக்கியம். இப்போது கல்லணைப் பகுதியில் செல்ல முடியும் என்பதால் அந்த வழியிலேயே சென்றோம். சரியாக ஏழரைக்கெலலம் போய்ச் சேர்ந்துட்டோம். போனவுடன் கையில் கொண்டு போயிருந்த இட்லி, காஃபியைச் சாப்பிட்டு முடித்துக் கொண்டோம். அதற்குள்ளாக குருக்கள் அபிஷேகத்திற்கான முன்னேற்பாடுகளைச் செய்து வைத்திருந்தார். அபிஷேகம் ஆரம்பம் ஆகி ஸ்வாமி சந்நிதியில் முடிந்தது. அடுத்து அம்பாள் சந்நிதிக்குப் போவோம்.

அரிசிலாற்றின் நடுவே முளைத்துக் கிடக்கும் மரங்கள்!  கருவிலி செல்லும் வழியில் சென்ற வாரம் எடுத்த படங்கள் 30/8/2018

புதூர் அருகே கொஞ்சம் சுத்தம் செய்யப்பட்டிருக்கிறது. 

கருவிலிக்கு அருகே சுத்தம் செய்யப்பட்டிருக்கும் பகுதியில் அரிசிலாறு

கூந்தலூரில் இருந்து கருவிலி செல்லும் வழியில் கடக்கும் பாலம். இதற்குக் கொஞ்சம் தள்ளி மூங்கில் பாலம் இருந்தது. முன்னால் எல்லாம் அந்தப் பாலத்தில் தான் கூந்தலூரில் இறங்கி நடந்து செல்வோம். இப்போ இந்தப் பாலம் கட்டி இருபது வருடங்களுக்குக் கொஞ்சம் மேலே இருக்கும். 

ராஜகோபுரம் பழைய படம். இந்த முறை கோபுரத்தை எடுக்கலை!

இந்தப் படத்துக்கு நன்றி கூகிளார் வாயிலாக தினமணி.காம் நான் எடுத்திருந்த பழைய படங்கள் சரியாக் கிடைக்கலை. இது ஒன்று மட்டும் கூகிளார் கொடுத்தது. மற்றக் கீழே உள்ள படங்கள் எல்லாம் இம்முறை எடுத்தவை!

சற்குணேஸ்வரர்! மிகப் பெரிய லிங்கம், மிகப் பெரிய அம்பாள்! கோபுரம் படம் இம்முறை எடுக்கலை. பல முறை போட்டிருப்பதால் வேண்டாம்னு விட்டுட்டேன். 

நம்ம ஆளு! சந்நிதியின் நுழைவாயிலில் வீற்றிருப்பார். பிராகாரத்தில் கோஷ்டத்தில் இடம் பெற்றிருக்கும் தெய்வங்களையும் இம்முறை எடுத்திருக்கேன். அவை அடுத்து வரும். 

பெண் சுதந்திரத்தின் வரம்பு எது? :(

பெண் சுதந்திரத்தின் எல்லை எதுனு தெரியலை! இப்போ அது கள்ளக் காதலனுடன் ஓடிப் போகப் பெற்ற குழந்தைகளைக் கொலை செய்வதில் கொண்டு விட்டிருக்கிறது! என்னவோ போங்க! எதுவுமே புரியலை! இந்தப் பெண்ணுக்கு சுதந்திரம் இல்லை என்பதால் இப்படிச் செய்தாராம். சொல்லிக்கிறாங்க! வர வர சுதந்திரத்தின் எல்லை எதுனே தெரியாமப் போச்சு! கணவனைப் பிடிக்கலைனா முறைப்படி விவாகரத்து கோரி குழந்தைகளைப் பார்த்துக்க முடியாதுனு சொல்லி விலகி வந்து காதலித்தவனைக் கைப்பிடித்திருக்கலாமே! வழியா இல்லை! அதை விட்டுட்டுக் கணவனோடும், குழந்தைகளோடும் கணவனின் பிறந்த நாள் கொண்டாட்டம் எல்லாம் கொண்டாடிட்டுப் பச்சைக் குழந்தைகளை விஷம் வைத்துக் கொல்ல எப்படி மனம் வந்ததுனு புரியலை! இதற்கு எல்லோரும் சொல்லும் காரணம் மனைவியைப் பிடிக்கலைனாக் கணவன் விவாகரத்து செய்துவிட்டுக் குழந்தைகளை அம்போவென விட்டுட்டு ஓடிப் போகலையா? அப்போ அந்தப் பெண்ணிற்கு யார் உதவினார்கள்! என்கின்றனர். இப்போ இந்தப் பெண்ணும் அப்படிச் செய்திருக்கலாமே என்பது தான் இங்கே சொல்லப்படுவதும்!

இன்னொரு இளம்பெண் கருத்துச் சுதந்திரம் என்னும் பெயரில் பயணம் செய்த விமானத்தில் பயணத்திலேயே மத்திய அரசுக்கு எதிராகக் கோஷம் போட்டிருக்கார். இதை அவர் தெருவிலேயே செய்திருக்கலாம். அல்லது விமான நிலைய வாயிலில் கூடச் செய்திருக்கலாம். மேடை போட்டுப் பேசி இருக்கலாம். தொலைக்காட்சிகளில் கூடச் சொல்லலாம்.  ஆனால் விமானப்பயணத்தில் இதெல்லாம் தவிர்க்க வேண்டியவை! அரசியல் கோஷங்கள் விமானத்துக்குள் பயணத்தில் செய்திருக்கக் கூடாதவை! ஆனால் வழக்கம்போல் நம்ம ஊர் அரசியல்வாதிகளும் ஊடகங்களும், மாணவர்கள் என்று சொல்லிக் கொள்பவர்களும் இந்தப் பெண்ணை ஏதோ புரட்சியாளராகக் கருதிக் கொண்டு அவருக்கு ஆதரவு தெரிவிக்கின்றனர். இதே தமிழக அரசியல்வாதிகள் எவரையேனும் இப்படி அந்தப் பெண் சொல்லி இருந்தால் அவர்களின் தொண்டர்கள் சும்மா இருந்திருப்பார்களா?

அந்தப் பெண்ணும் மன்னிப்புக் கேட்க மாட்டேன் என நீதிமன்றத்தில் சொல்லி இருக்கிறார். எனினும் நீதிமன்றம் அறிவுரை சொல்லி ஜாமீன் வழங்கி உள்ளது. இத்தனைக்கும் அந்தப் பெண்ணின் தந்தை ஓர் மருத்துவர். இவரும் கனடா நாட்டில் ஆராய்ச்சிப் படிப்புப் படிக்கிறார். அங்கே செல்லும்போது பயணத்தில் இப்படிக் கூச்சல் போட்டிருக்க முடியுமா இந்தப் பெண்ணால்? சுதந்திரத்திற்கும் ஓர் எல்லை வகுத்திருக்கலாமோ எனத் தோன்றுகிறது இத்தகைய செய்திகள்.
ஆச்சு, இனிமேல் இந்தப் பெண்ணின் விடுதலை கோரி மெரினாவில் கூட்டம் கூட வேண்டியது தான் பாக்கி!  அந்த அளவுக்கு ஆதரவுக்குரல்கள் எழும்புகின்றன. ஆதரவுக்குரல் கொடுப்போர்களில் எவரையானும் இப்படி எதிர்த்து விமானத்தில் கூட வேண்டாம், தெருவில் கோஷம் போட்டாலே தொண்டர்கள் சும்மா விடுவார்களா?

விமானப் பயணத்திற்கென சட்டதிட்டங்கள் இருக்கின்றன. அதை முறைப்படி நாம் பின்பற்ற வேண்டும். நம்மாலும், நம் நடவடிக்கைகளாலும் கூடப் பயணம் செய்யும் மற்றப் பயணிகள் பாதிக்கப்படக் கூடாது அல்லவா? இந்த கோஷத்தைக் கேட்ட எவரேனும் உணர்ச்சிவசப்பட்டிருந்தால்? அது இன்னும் மோசமாகி விடுமே! அதனால் தான் விமானப்பயணங்களில் இத்தகைய பாதுகாப்புச் சட்டங்கள்! உலகிற்கே பொதுவானவை. நமக்கு மட்டும் அல்ல. பார்க்கப்போனால் இங்கே மென்மையாகக் கையாள்கின்றனர். இதுவே வெளிநாடாக இருந்திருந்தால் உடனடியாக அந்தப் பெண் இறங்கிய உடனே சிறைச்சாலைதான்! ஆனால் இங்கே கைது நடவடிக்கைக்கே எதிர்ப்பு!  இப்போது இந்தப் பெண் கைது செய்யப்பட்டிருப்பதும் அந்தப் பாதுகாப்புச் சட்டத்தை மீறியதால் தான்! மற்றபடி மத்திய அரசை எதிர்த்து கோஷம் போட்டதால் அல்ல. அதுவும் இவர் தான் பயணம் செய்யப் போகும் விமானத்தில் பாஜக தலைவி வரப்போவதை அறிந்து கொண்டு தான் பிரச்னை செய்யப் போவதாக ட்விட்டர் பக்கத்தில் அறிவித்திருக்கிறார். ஆகவே இது இவரால் முன்கூட்டித் திட்டமிட்டுச் செய்யப்பட்ட ஒரு சம்பவம். அதற்காகத் தான் கைது, நடவடிக்கை எல்லாம். இதை யாருமே சொல்லவில்லை. எல்லோரும் மத்திய அரசை எதிர்த்துக் கோஷமிட்டதால் கைது என்றே திரித்துப் பேசுகின்றனர். இதில் என்ன மகிழ்ச்சினு தெரியலை! :)))))))) 

கிச்சாப்பயலோட பிறந்த நாள் கொண்டாட்டங்கள்!

பல்லாண்டுபல்லாண்டு பல்லாயிரத்தாண்டு
பலகோடிநூறாயிரம்
மல்லாண்டதிண்தோள்மணிவண்ணா. உன்
செவ்வடிசெவ்விதிருக்காப்பு.

வண்ணமாடங்கள்சூழ் திருக்கோட்டியூர்
கண்ணன்கேசவன் நம்பிபிறந்தினில்
எண்ணெய்சுண்ணம் எதிரெதிர்தூவிடக்
கண்ணன்முற்றம் கலந்துஅளராயிற்றே. (2) 1.

14:
ஓடுவார்விழுவார் உகந்தாலிப்பார்
நாடுவார்நம்பிரான் எங்குத்தானென்பார்
பாடுவார்களும் பல்பறைகொட்டநின்று
ஆடுவார்களும் ஆயிற்றுஆய்ப்பாடியே.

ஆய்ப்பாடிக்கொண்டாட்டம்

மேற்கண்ட சுட்டியில் ஆய்ப்பாடியில் கண்ணன் பிறந்த நாள் கொண்டாட்டம் பற்றிய விபரங்களை விரும்பியவர் படிக்கலாம்.

இன்று நம்ம கிச்சாப்பயல், கண்ணனின் பிறந்த நாள்.  ஒரே நாளைக்கு பக்ஷணங்கள் பண்ண முடியாதுனு நேத்திக்குக் கொஞ்சம் இன்னிக்குக் கொஞ்சம்னு பண்ண நினைச்சுக் காலையிலேயே அரிசியை ஊற வைச்சு எட்டு மணி அளவில் நீரை வடித்து அரிசியை உலர வைத்து இருந்தேன். ஆனால் நேத்திக்குனு பார்த்து இங்கே மின்வெட்டு! ஶ்ரீரங்கம் முழுவதும் மின்வெட்டாம். நல்லவேளையா நம்ம பகுதி வேறே இணைப்பு என்பதால் நம்ம வீட்டிலே மின்சாரம் இருந்தது. நாளை திங்களன்று மின் வெட்டாம் நம்ம பகுதிக்கு! அதை நாளைக்குப் பார்த்துக்கலாம்.

மின்வெட்டு இருந்த பகுதியில் தான் எல்லா மாவு அரைக்கும் மிஷின்களும் உள்ளன. அங்கே போனால் மிஷினே திறக்கலை! அங்கே இருந்து ரங்க்ஸ் தொலைபேசிக் கேட்டார், என்ன செய்யலாம்னு.  ஊறிய அரிசியைத் தூக்கிண்டு எங்கே போறது! திரும்ப எடுத்துட்டு வாங்கனு சொல்லிட்டேன். சரி, இந்த வருஷம் கிச்சாப்பயல் தன்னோட வேலையைக் காட்டறான். நீ  இங்கே வந்தப்புறமா ஒவ்வொரு வருஷமும் மிஷினில் மாவு அரைச்சுத் தானே பண்ணறே! இந்த வருஷம் பழைய மாதிரி மிக்சியில் அரைச்சே பண்ணுனு சொல்லாம சொல்லிட்டான். நல்லவேளையா நம்ம குடியிருப்பிலேயானும் மின்சாரம் இருக்கேனு நினைச்சேன். சமையலை முடிச்சுட்டு மிக்சியில் பெரிய ஜாரில் போட்டு அரிசியைப் பொடித்துச் சல்லடையில் சலிச்சு மாவாக்கி எடுத்தேன். ஒரு கிலோ அரிசியும்  அரைச்சாச்சு. மிக்சி சூடு தணிய நடு நடுவே பத்து நிமிஷம் இடைவெளி! பின்னர் வேண்டிய ஏற்பாடுகளை எல்லாம் செய்து கொண்டு மதியம் ஒன்றரை மணிக்கு முன்னேயே ஆரம்பிச்சுட்டேன்.

முதல்லே முறுக்கு! பிள்ளையார் பிடிச்சு வைச்சுட்டு ஆரம்பிச்சேன்.  முறுக்கு சுத்திட்டுப் பின்னர் தட்டை பண்ணி முடிச்சுட்டு எல்லாத்தையும் சுத்தம் செய்துட்டு சமையலறையை விட்டு வரச்சே நாலரை ஆயிடுச்சு! மிச்சம் நாளைக்குப் பார்த்துக்கலாம்னு விட்டுட்டேன். இன்னிக்கு மத்தியானம் சரியா ஒன்றரைக்கு ஆரம்பிச்சேன். வெல்லச்சீடைக்குப் பாகு வைச்சு மாவில் கலந்து வைச்சுட்டு, வெண்ணைச் சீடை, சீப்பி, கோளோடை, உப்புச் சீடை போன்றவை முடிச்சுக் கொண்டு கடைசியில் வெல்லச் சீடையைப் போட்டேன். முதல்லே வெல்லச்சீடை கொஞ்சம் முகத்தைச் சுணுக்கிக் கொண்டாலும் பின்னர் வந்து விட்டது. அப்புறமாக் கோலத்தைப் போட்டு முடிச்சுட்டுத் திரும்ப வந்து பாயசத்தை முடிச்சேன். வடைக்கு அரைச்சு வைச்சேன். பின்னர் வடையை சூடாப் போட்டுக்கலாம்னு மற்ற வேலைகளை முடித்துக் கொண்டு கணினிக்கு வந்து உட்கார்ந்தேன். சாயங்காலமா ஏழு மணி போல் நிவேதனம் செய்யணும். படம் எடுத்துப் போடறேன்.

நம்ம வீட்டு ராமர் எல்லாத்தையும் பார்த்துட்டு என்னோட பிறந்த நாள் வந்தால் நீர் மோர், பானகம், வடைப்பருப்பு, பாயசம் தான்! வடை கூட எல்லோரும் பண்ணறதில்லை. இது என்ன அநியாயம்! னு நினைச்சுண்டு இருந்தார். 

கீழ்த்தட்டு உம்மாச்சிங்களும் பார்த்துண்டு இருக்காங்க! எங்களுக்கு எதுவும் இல்லையானு!

கிச்சாப்பயலுக்குப் பசும்பால், பசு வெண்ணெய், பசுந்தயிர், அவல், வெல்லம், முறுக்கு, தட்டை, உப்புச் சீடை, வெண்ணைச் சீடை, சீப்பி, கோளோடை, வெல்லச் சீடை, வடை, பாயசம், வெற்றிலை, பாக்கு, வாழைப்பழம், நாவல் பழம்! (ஒரு நாவல் பழம் ஒரு ரூபாயாம்! நாங்க சாப்பிட முடியாது!)கொய்யா, ஆப்பிள், சாத்துக்குடி!

  பலகாயிலே கிச்சாப்பயல்! இன்னிக்குக் குளிச்சான். மல்லிகைப்பூ நான் உதிரி வாங்கித் தொடுத்தேன். துளசி எல்லாம் நேத்தே வாங்கி வைச்சாச்சு. இன்னிக்குக் கிச்சாவுக்குச் சார்த்தியாச்சு. பெரிய கிச்சா பக்கத்திலே புஷ்கரிலே வாங்கின தொட்டில் கிச்சா. சின்னக் கிச்சாவும் உண்டு. இந்தப் பெரிய கிச்சாவுக்கு நடுவிலே இருக்கிறதாலே உத்துப் பார்த்தாத் தான் தெரியும். எல்லா பக்ஷணங்களுமே நல்லா வந்திருக்கு! முறுக்கு தான் சுத்தும்போது முடியாமக் கொஞ்சம் கோணல்! பரவாயில்லைனு விட்டுட்டேன். 

மெதுவா வரேன்!

வந்துட்டேன். இரண்டு நாட்கள் கோயில் பிரார்த்தனைகள் நிறைவேற்றம். நேத்திக்கு மத்தியானமே வந்தாச்சு. என்றாலும் உடனடியாகப் பதிவு போட முடியவில்லை. அதோடு இம்முறை இரண்டு நாட்களும் கோயில் பிரசாதமே சாப்பாடாக ஆகி விட்டது. ஆகவே வயிறும் கெடவில்லை. பிரசாதம் சாப்பிடும்போது நெல்லைத் தமிழரைத் தான் நினைச்சுண்டேன். அதுக்காக மத்தவங்க நினைப்பு இல்லைனு எல்லாம் இல்லை. பிரசாதம்னு ஆவலோடு கேட்பவர் அவர் ஒருத்தர் தானே! அதான்! நாளைக்குக் கிச்சாப்பயலுக்குப் பிறந்த நாள் என்பதால் அதற்கான ஏற்பாடுகளைக் கவனிக்கணும். ஆகவே இரண்டு நாட்களும் வேலை மும்முரம். திங்கள், செவ்வாய் கொஞ்சம் வருவேன். அப்புறமா உறவினர் வருகை! அதுக்கப்புறமாக் கொஞ்சம் ஓய்வு. அப்புறமா ஆவணி அவிட்டம், நம்ம நண்பரோட பிறந்த நாள்னு வரிசையா வருது. ஆகவே கொஞ்ச நாட்கள் ஒரே ஓட்டம், பிடியாகத் தான் இருக்கும்.

நடுவில் இரண்டு புத்தகம் படித்தேன்.இஃகி, இஃகி, புதுசெல்லாம் இல்லைங்க! ஏற்கெனவே படிச்சது தான். மீள் வாசிப்பு. சித்தப்பாவின் பதினெட்டாவது அக்ஷக்கோடும், தேவனின் சிஐடி சந்துருவும். நடுவில் கிடைக்கும் நேரத்தில் எடுத்த படங்களையும் போயிட்டு வந்த விபரங்களையும் பகிர்கிறேன்.  இப்போ டாட்டா!