ரங்குவோட பூச்சாண்டி சேவை! குலோப்ஜாமூனோட "திங்க" வாங்க!

முதல்லே எல்லோரும் குலோப்ஜாமூன் எடுத்துக்குங்க. காரத்துக்குத் தவலை வடை நம்ம எ.பியிலே இருக்கு. முதல்லே இங்கே வந்துட்டுஸ்வீட் எடுத்துண்டு அப்புறமாத் தவலை வடை சாப்பிடப்  போகும்படியாப் பதிவைப் போடணும்னு நினைச்சேன். முடியலை. படமே அப்லோட் ஆகலை. அதோட ஒரே ஓட்டம், பிடி! அதிலே உட்காரவே நேரமே வேறே இல்லை. ராத்திரி குஞ்சுலு வேறே வந்ததா! அப்புறமாப் போய்ப் படுத்துட்டேன். முதல்லே பார்க்கிற ஜாமூன் ஜூன் மாசமோ, ஜூலை மாசமோ பண்ணினது. உருளியிலே பண்ணினேன்.    நான் எந்தப் பாகு வைக்கிறதா இருந்தாலும் வெண்கல உருளியில் தான் வைப்பேன். கீழே உருளியில் நீங்க பார்க்கிற குலோப்ஜாமூன் முன்ன்னாடி பண்ணினது. அதுக்குக் கீழே இருப்பது இப்போ வெள்ளிக்கிழமை பண்ணினது. ஒரு குட்டிப் பயலைப் பார்க்கப் போனேன். அப்போப் பண்ணி எடுத்துண்டு போனது கீழே இருப்பது. இப்போப் பண்ணும்போது அலுமினியம் சட்டியிலே பாகு வைச்சேன். நெ.த. கல்கத்தா அலுமினியம் சட்டியே பார்த்தது இல்லைனாரா, அதான் இந்த முறை அதிலே பண்ணினேன். இதை விடப் பெரிசு எல்லாம் இருந்தது. அவ்வளவு இப்போத் தேவை இல்லை என்பதால் தானம் கொடுத்துட்டேன். 

கல்கத்தா அலுமினியம் சட்டி

ஜாமூன்கள்

ஜாமூன்கள் எல்லாம் காலி! க்ர்ர்ர்ர்ர்ர்ர்ர்ர், சாப்பிடக் கூடாதுனு ரங்க்ஸ் 144 தடை உத்தரவு. அதையும் மீறி இரண்டு சாப்பிட்டுட்டு மிச்சம் சொந்தக்காரங்களுக்குக் கொடுத்தாச்சு. ஒரு முறை இந்த குலோப் ஜாமூன் பவுடரில் சப்பாத்திக்குத் தொட்டுக்க மலாய் கோஃப்தா பண்ணணும். ஆனால் ஒண்ணு வாங்கினால் ஒண்ணு இலவசம் என்பதால் இன்னொண்ணை என்ன செய்யறது? யோசிக்கணும். ஏதேனும் திப்பிசம் தோணாமலா போகும்! பார்ப்போம். :)


பூச்சாண்டி சேவை!


பத்து நாட்களாக ரங்குவைப் பார்க்கப் போகணும்னு சொல்லிட்டிருந்தேன். ஏனெனில் இப்போப் பவித்ரோத்ஸவம் நடக்குது. இது முடிஞ்சு ரங்குவுக்குத் தைலக்காப்பு சார்த்தினாங்கன்னா பின்னர் தீபாவளி வரை திருவடி தரிசனம் கிடைக்காது. ஆகவே ரங்குவைப்பார்க்கணும் என்பதோடு இப்போப் பூச்சாண்டி சேவை என்னும் சிறப்புச் சேவை வேறே. இந்த சேவை பார்த்ததே இல்லை. இது குறித்த விவரங்களுக்குப் படத்தின் அருகே உள்ள சுட்டியைக் க்ளிக் செய்து ஆன்மிகப்பயணம் வலைப்பக்கம் போங்க!  எல்லாம் ஒரு விளம்பரந்தேன்!

இன்னிக்கு காயத்ரி ஜபம் என்பதால் காலையிலே ஆகாரம் ஏதும் எடுத்துக்காமல் நேரடியாப் பத்து மணிக்குச் சாப்பாடு சாப்பிட்டாச்சு. உடனே ரங்குவையும் பார்த்து விசாரிச்சுட்டு வரலாம்னு கிளம்பியாச்சு. வழக்கம் போல் முதல்லே தாயாரைப் பார்த்து உத்தரவு வாங்கிக் கொண்டு வெளியே வந்தோம். நல்லவேளையா பாட்டரி கார் நின்னுட்டு இருந்தது. அங்கே அரங்கன் சந்நிதி நுழைவாயிலுக்குக் கொண்டு விட்டாங்க. மறுபடியும் உள்ளே நுழையும் முக்கிய நுழைவாசலை மூடிட்டுக் கம்பி கட்டி உள்ளே அனுப்பறாங்க! உள்ளே போனதும் கொஞ்சம் கூட்டம் இருந்ததால் கவலையாக இருந்தது. ஆனால் 50 ரூ டிக்கெட்டுக்கு அவ்வளவு கூட்டமில்லை என்பதால் டிக்கெட் வாங்கிக் கொண்டு உள்ளே போனோம். இங்கேயும் நுழையும் படிக்கட்டுகள் முதல் முதல் ஏழு வருஷங்கள் முன்னாடி போனாப்போல் இரண்டாம் நுழைவாயிலுக்கு அருகே மாத்திட்டாங்க! கொஞ்சம் கூட்டம் இருக்கத் தான் செய்தது. மெதுவாக வேறே நகர்ந்தது.

அரை மணி நேரம் நின்றிருப்போம். அரங்கன் சந்நிதி வந்தது. வழக்கம்போல் போறச்சேயே நம்பெருமாளைப் பார்த்துட்டேன். அவர் ஏதேதோ மாலைகள் போட்டிருந்தார். பூச்சாண்டிக்கோலத்தில் வித விதமான மாலைகள் உண்டுன்னாலும் இது பார்க்க ருத்திராக்ஷம் மாதிரி தெரிஞ்சது. ரங்க்ஸ் இல்லை சாளக்கிராமம் என்கிறார். எதுனு கேட்டால் அங்கே யாரும் பதில் சொல்லப் போறதில்லை. ஆகவே நிதானமாப் பெரிய ரங்குவை தரிசனம் செய்துக்கலாம்னு இருந்துட்டேன். தரிசனம் செய்தால் என்ன ஆச்சரியம்! பெரிய ரங்குவின் வலக்கண் நம்மையே பார்க்கிறாப்போல்  ! அவர் கண்ணை விழித்துப் பார்க்கிறாப்போல் இருக்கு! தூக்கி வாரிப் போட்டது எனக்கு! அதுவும் கடைக்கண் தரிசனம்! எனக்குத் தான் அப்படினு நினைச்சா நம்ம ரங்க்ஸும் வெளியே வந்ததும் அதையே சொல்றார்.

திருமுடி, திருவடி தரிசனம் கண்ணாரக் கண்டு கொண்டு விடாப்பிடியாகத் துளசி பெற்றுக் கொண்டு வெளியே தீர்த்தம் வாங்கிக் கொண்டுசந்நிதியை விட்டு வெளியே வந்தோம். அங்கே கிளிமண்டபம் இன்று திறந்து இருந்தது. அங்கே தான் பரவாசுதேவரைப் பார்க்க முடியும்.  பல நாட்கள் ஆகிவிட்டதே எனக் கிளி மண்டபம் ஏறிப் பர வாசுதேவரையும் தங்க கோபுரத்தில் தரிசனம் செய்து கொண்டோம்.  முன்னாடி எல்லாம் மேலே கூரையில் உள்ள ஜன்னல் திறந்திருக்கும். பரவாசுதேவரை முழுசாப் பார்க்க முடியும். இப்போ ஜன்னலில் கம்பி போட்டிருக்காங்க. ஆகவே முழுசாப் பார்க்க முடியாது! :( மறுபடி கீழே இறங்கித் தொண்டைமான் மேடு வழியே மேலே ஏறி விமான தரிசனம் மறுபடி செய்து கொண்டு வெளியே வந்தோம்.  இப்போவும் நல்லவேளையா பாட்டரி கார் தயாராக இருக்கவே அதிலே ஏறித் தாயார் சந்நிதிக்கு அருகே வந்து வடக்கு வாசலில் வெளியே வண்டியை விட்ட இடத்தில் இருந்து எடுத்துக் கொண்டு வீட்டுக்கு வந்து சேர்ந்தோம்.