வண்ண விளக்கு அலங்காரங்களும் பனிக்கட்டிக் கொண்டாட்டங்களும்!

ஞாயிற்றுக்கிழமை இங்கே எங்க பையரின் நண்பர் ஒருத்தர் வீட்டுக்குப் போயிட்டோம். பின்னர் திங்களன்று கொஞ்சம் சொந்த வேலையில் மும்முரம். நேற்றுச் செவ்வாயன்று வெளியே போய்க்கிறிஸ்துமஸ் விளக்கு அலங்காரத்தைப் பார்த்துவிட்டு வரலாம் என ஏற்கெனவே பையர் சொல்லி இருந்தார். அதன்படி மத்தியானமாக் கிளம்பினோம்.

பனிக்கட்டியைச் செதுக்கிச் சிற்பங்கள் செய்வதில் வல்லவர்களான ஒரு  குழு இங்கே ஹூஸ்டன் நகருக்கு அருகே இருக்கும் "கால்வெஸ்டன் தீவு" இல் இருக்கும் "Moody Gardens" உள்ளே இருக்கும் ஐஸ்லாந்தில் பல்வேறு விதமான சிற்பங்களைச் செதுக்கிப் பார்வைக்கு வைத்திருக்கிறார்கள். இந்தச் சிற்பங்கள் உலகம் முழுதும் உள்ள நாடுகள் இந்தக் கிறிஸ்துமஸை எவ்வகையில் வரவேற்கின்றனர் என்பதைக் காட்டும் விதத்தில் செதுக்கப்பட்டு உள்ளது. உள்ளே முழுக்க முழுக்கப் பனிக்கட்டி! அங்கே நாம் ஏஸ்கிமோக் குடியிருப்பைக் கூடப் பார்க்கலாம். இதற்கு 2 மில்லியன் பவுண்ட்ஸ் பனிக்கட்டிகள் செலவழிக்கப்பட்டிருக்கின்றன.



படத்துக்கு நன்றி கூகிள்.. நான் எடுத்த படங்களும் பயமுறுத்த வரும்!

இங்கிருக்கும் ஈஃபல் டவரின் மேலே இருந்து பார்த்தால் இங்கே செதுக்கப்பட்டிருக்கும் ஆஸ்திரேலியாவின் சிற்பங்கள்,ஹாலந்து, ரியோ மற்றும் அங்கிருந்து மேலே பரிசுகள் அளிக்கவரும் சான்டாவைக் கூடப் பார்த்தாலும் பார்க்கலாம். இங்கே அமைக்கப்பட்டிருக்கும் கதகதப்பு உண்டாக்கும் நெருப்பு உண்டாக்கும் இடம் கூட பனிக்கட்டியால் உருவாக்கப்பட்டது. அதைத் தவிரவும் நியூயார்க்கில் இருக்கும் "சுதந்திர தேவி" சிலையும் கூட பனிக்கட்டிகளால் உருவாக்கப்பட்டதே!

இது ஒவ்வொரு வருடமும் நவம்பர் மாதம் "நன்றி தெரிவிக்கும் நாள்" அன்று பொதுமக்கள் பார்வையிடத் தயாராக்கப்படுகிறது. அன்றிலிருந்து ஆரம்பித்து ஜனவரி மாதம் 12 ஆம் தேதி வரையிலும் பொதுமக்கள் பார்வைக்கு வைக்கப்படுகிறது. இதைத் தொடர்ந்து உள்ள பெரிய மைதானத்திலே "பண்டிகை விளக்குகள்" அலங்காரம் செய்யப்படுகின்றன. இவை சுமார் 2 மைல் முதல் 3 மைல் வரை நீளம் உள்ளது, பாதையின் இரு மருங்கிலும் விளக்கு அலங்காரங்கள் செய்யப்படுகின்றன.


இந்த மூடி கார்டன்ஸில் தங்குவதற்கான இடங்களும் உள்ளன. அங்கேயே தங்கி இரண்டு , மூன்று நாட்கள் அங்கே சுற்றுவட்டாரத்தில் இருக்கும் இடங்கள் மற்றும் சின்னக் கப்பல்ப் பயணம் எல்லாம் செய்வார்கள். நாங்க அதுக்கெல்லாம் 2011 ஆம் ஆண்டிலேயே போயிட்டு வந்துட்டதால், இந்த முறை முக்கியமான இந்த அலங்காரங்கள் மட்டும் பார்த்துவிட்டு வரலாம் எனக் கிளம்பினோம்.  ஐஸ்லாந்தில் உள்ள எல்லா நாடுகளின் கிறிஸ்துமஸ் கொண்டாட்ட அலங்காரங்கள் (அனைத்தும் பனிக்கட்டியால் செய்தது), அதைத் தொடர்ந்து "பண்டிகைகளுக்கான விளக்கு அலங்காரங்கள்" அங்கேயே ஓடும் சின்ன ரயில்ப் பயணம் (அதில் பயணம் செய்வது ரொம்பக் கஷ்டம்! ஐஸ் ஸ்கேட்டிங், ஆர்க்டிக் ஸ்லைட், இயன்றால் சான்டாவுடன் படம் எடுத்துக் கொண்டு விளையாடுவது என அங்கே நிறையவே பார்க்கவும் களிக்கவும் இடங்கள். ஆங்காங்கே சின்னச் சின்ன ரெஸ்டாரன்டுகள். ஆனால் அவற்றில் லேஸ் சிப்ஸும், சூடான சாக்லேட் பானமும் தவிர்த்து மற்றவை நாம் சாப்பிடும்படி இல்லை.

அங்கே சுற்றிப் பார்க்க ஒரு நபருக்குக் கிட்டத்தட்ட 30 டாலர்கள், நாங்க மூத்த குடிமக்கள் என்பதால் எங்களுக்குக் கழிவு உண்டு. குழந்தைகளுக்குப் பதினைந்து டாலர்கள். நாங்க மத்தியானமாச் சாப்பாடை வீட்டில் முடித்துக்கொண்டு கிளம்பினோம். இங்கிருந்து கால்வெஸ்டன் போக வர 120 மைல். ஒரு மணி நேரத்தில் போகலாம். ஆகவே முதலில் ஐஸ்லாந்தைப் பார்த்துக் கொண்டு, பின்னர் கொஞ்சம் ஓய்வெடுத்துக் காஃபி, தேநீர் போன்ற ஏதானும் சாப்பிட்டுவிட்டு, அங்கே காட்டும் 3D திரைப்படம் பார்த்துவிட்டுப் பின்னர் விளக்கு அலங்காரத்தைப் பார்த்துவிட்டு வீட்டுக்குத் திரும்பலாம் என்னும் எண்ணம். வரும் வழியில் இரவு உணவை வெளியே எங்கானும் சாப்பிட்டுக்கலாம் என்னும் திட்டம்.

இப்போதைக்கு இதைப்பாருங்க! பின்னால் வந்து பயம் காட்டறேன். செரியா?