சில, பல, எண்ணப்பகிர்வுகள்!

மைத்துனருக்கு அறுவை சிகிச்சை முடிந்து ஐசியூவில் வென்டிலேடர் உதவியுடன் இருந்தவர் இப்போது வென்டிலேடர் நீக்கப்பட்டு இன்னமும் ஐசியூவில் தான் இருக்கிறார். நினைவு திரும்பி விட்டது என என் நாத்தனார் செய்தி அனுப்பினார். அனைவரின் பிரார்த்தனைகளாலும், கடவுள் அனுகிரஹத்தாலும் பூரணமாய்க் குணமடைய வேண்டும்.

நாங்க பெண் வீட்டிலிருந்து இங்கே வந்த அன்று குட்டிக்குஞ்சுலுவுக்கு ஒரே கோபம். விட்டு விட்டுப் போயிட்டோம் என்று. அழுது கொண்டே உள்ளே ஓடிப் போய் விட்டது. பின்னர் பெண், மாப்பிள்ளை, அப்புவெல்லாம் கிளம்பும்போது அவங்களுக்கு "பை" சொல்ல வந்தது ஓரக்கண்ணால் என்னைப் பார்த்துக் கொண்டே "பை" சொன்னது. ஏனெனில் நான் பெண் வீட்டில் இருந்து    கிளம்பும்போது கட்டி இருந்த உடையை இன்னமும் மாற்றவில்லை. ஆதலால் சந்தேகம். ஆனால் நான் அங்கேயே உட்கார்ந்திருக்கேன் என்பதைப் பார்த்ததும்தான் அதுக்குச் சிரிப்பே வந்தது.

இரண்டு நாட்களாக ஒரே கொட்டம். விளையாட்டு. பள்ளிக்குப் போய்விட்டு வரும்போதே நான் வரவேற்புக்கூடத்தில் உட்கார்ந்திருந்தால் என்னைக் கணினியை மூடச் சொல்லிட்டு விளையாடக் கூப்பிடும். நேற்றும் அப்படித்தான் கூப்பிட்டது. அதான் கணினியை மூடிட்டுப் போயிட்டேன். ஒன்பது மணி வரை விளையாடியும் அதுக்கு அலுக்கவில்லை. தூக்கமும் வரலை. பையர் வலுக்கட்டாயமாகத் தூக்கிச் சென்றார்.  ராத்திரி படுக்க அவங்க அப்பா, அம்மா கூப்பிட்டால் எங்க பின்னாடி வந்து ஒளிஞ்சுக்கும். பள்ளிக்குப் போகையிலும் அழகாய் "டாடா" காட்டிட்டுப் போகும்.

ஒரு சில படப்பதிவுகள் உள்ளன. நேரம் கிடைக்கும்போது பகிர்ந்து கொள்ளவேண்டும்.
*********************************************************************************

தாய்த்திருநாட்டில் பெண்கள் அனுபவிக்கும் கொடுமைகள் இன்னமும் குறையவே இல்லை என்பதை அறியும்போது மனதில் வருத்தம் ஏற்பட்டது/ஏற்பட்டு வருகிறது. பெண்ணாகப் பிறப்பதே பிழை என்னும்படி ஆகி வருகிறது. ஏன் இப்படி எல்லாம் ஆண்கள் நடந்து கொள்கிறார்கள் என்பதை நினைக்கையில் ஆண் வர்க்கத்தின் மீதே வெறுப்பு ஏற்படுகிறது. இவர்களை எல்லாம் என்ன தண்டனை கொடுத்தாலும் திருத்தவே முடியாது என எண்ணுகிறேன். அதிலும் ஒரு திரைப்பட இயக்குநர்/தயாரிப்பாளர் தெரிவித்திருக்கும் கருத்துகள் அதிர்ச்சியைத் தருகின்றன. பெண்களைப் பலாத்காரம் செய்ய வந்தால் பெண்கள் எதிர்ப்புத் தெரிவிக்கக் கூடாது    என்கிறார். பலவந்தம் பண்ண வருபவர்களிடம் அவர்கள் தொடர   ஒத்துக்கொள்ள வேண்டுமாம். கருத்தடைத்தடுப்புச் சாதனங்களை பலவந்தம் செய்ய வரும் ஆண்களுக்குக் கொடுத்து ஊக்குவிக்க வேண்டுமாம். எதிர்த்தால் கொல்லத்தான் செய்வார்களாம்.


அப்படித்தான் நடக்குமாம்! அதை எதிர்கொள்ளத்தான் வேண்டுமாம்! பெண்ணியம் பேசுபவர்கள் பலாத்காரம் செய்பவர்களை எல்லாம் எதிர்த்துப் பேசக் கூடாதாம். அவர்களாலும் நீதிமன்றங்களாலும் தான் இப்படி எல்லாம் ஆண்கள் நடந்து கொள்ளும்படி ஆகிறதாம். நீதிமன்றங்கள் எல்லாம் தலையிடவே கூடாதாம். அவர் வீட்டுப் பெண்களுக்கும் இதே சட்டத்தைக் கடைப்பிடிப்பார் என நம்புவோமாக! :((((((((( அந்தப் பெண்ணிற்கும் பெற்றோருக்கும் எவ்வளவு ஆசைகள், கனவுகள் இருந்திருக்கும்! வாழ வேண்டிய வயதில் அந்தப் பெண்ணைக் கெடுத்ததோடு அல்லாமல் எரித்தும் கொல்ல எப்படித்தான் மனசு வந்ததோ! இவர்களுக்கு வாழ்நாள் முழுதும் மறக்காமல் என்ன தண்டனை கொடுத்தால் சரியாக இருக்கும்? என்னைப் பொறுத்தவரை அவர்கள் இன்னொரு பெண்ணை மணக்கக் கூட முடியாத அளவுக்கு அவர்கள் உறுப்பை இழக்கச் செய்வது ஒன்றே சிறந்த தண்டனையாகத் தோன்றுகிறது. வாழ்நாள் முழுக்கக் கல்யாணம், காட்சி இல்லாமல் உறுப்பை இழந்து திரிய வேண்டும்.  கைது செய்யப்பட்டவர்கள் இளைஞர்களாகத் தெரிகிறார்கள் என்பதால் வழக்கம் போல் எச்சரிக்கை செய்து, தையல் மிஷின் வாங்கிக் கொடுத்து விடுதலை செய்து விடுவார்கள் என நம்புவோமாக!