வரும் புத்தாண்டில் நன்மைகள் சிறக்கட்டும்!

இங்கே யு.எஸ். வந்ததிலிருந்து அதிகம் இணையத்தில் உட்கார முடியலை. பகல் பொழுது பூராவும் குழந்தையுடன் போயிடும். காலை நேரம் அதிகம் உட்கார முடியாது. வேலை இருக்கும். மதியம் மட்டும் சிறிது நேரம் உட்காருவேன்.  இங்கே இன்னமும் புத்தாண்டு பிறக்கவில்லை. இப்போது நேரம் மாலை நாலே கால். அங்கே விடிகாலை மூன்றே முக்கால் மணி இருக்கும். மனமெல்லாம் இந்தியாவில் தான் இருக்கு. இங்கே வந்தாலும் ஒரே இறுக்கமான சூழ்நிலையாகத் தான் அமைந்து விட்டது.  இந்த வருடம் முழுவதுமே அப்படி ஆகி விட்டது. வரும் வருடமானும் சரியாக இருக்கவேண்டும் என்று அனைவர் சார்பிலும் பிரார்த்திக்கிறேன். நண்பர்கள் அனைவருக்கும் இனிய புத்தாண்டு வாழ்த்துகள்.

கடந்து போன வருடம் பொதுவாகவே மோசமான வருடமாகப் பலருக்கும் இருந்திருப்பது தெரிய வருகிறது. அரசியல் சூழ்நிலையும் சரி இல்லை.  தமிழ்நாட்டுச் சூழ்நிலை கேட்கவே வேண்டாம். இந்த அழகில் அனைவருக்கும் ரூபாய் நோட்டுச் செல்லாது என்று அறிவிப்புச் செய்ததில் மன வருத்தம். இது பெரும்பாலும் தமிழ்நாட்டில் தான் அதிகம் தெரிகிறது என நினைக்கிறேன். ஊடகங்களும் இதைப் பெரிது படுத்துகின்றன. ஆனால் இதன் மூலம் விளைந்திருக்கும் நன்மைகளை எவரும் சிந்தித்துப் பார்ப்பதில்லை. பொதுவாகக் குளிர் நாட்களில் காய்கறிகள் விலை குறைந்து விடும். ஆகவே அதை விட்டு விடுவோம். பருப்பு வகைகள் விலை மிகக் குறைந்திருப்பதாக தினசரிகள் சொல்கின்றன. அதை யாருமே சுட்டிக் காட்டவே இல்லை. ஒரு ரூபாய் விலை உயர்ந்தால் அதைச் சொல்லிக் கொண்டே இருப்பதோடு அதனால் பலரும் கஷ்டப்படுவதாகச் சொல்லித் திரும்பத் திரும்ப அதையே காட்டுவார்கள். ஆனால் விலை குறையும்போது அதைச் சொல்வதில்லை. :(

நேரடிப் பணபரிவர்த்தனையைக் குறைத்ததை ஒரு குற்றமாகச் சொல்பவர்கள் அதன் மூலம் ஒரு இடத்தையோ, பொருளையோ விற்பதின் மூலம் கணக்கில் காட்டும் பணம், கணக்கில் காட்டப்படாத பணம் என்று இருந்து வந்தது இனிமேல் அப்படிச் செய்ய முடியாது என்பதை மறந்து விடுகிறார்கள். அரசுக்கு விற்பதாக இருந்தால் அது வெளிப்படையாக விற்க வேண்டி இருக்கும் என்பதால் யாரும் விற்க மாட்டார்கள். அதையே தனியாருக்கு விற்கும்போது வெள்ளைப் பணம், கறுப்புப் பணம் எனக் கணக்கில் காட்டாமல் வாங்குவார்கள். இப்போது அனைத்தும் செக் மூலம் அல்லது இணையம் மூலம் பரிவர்த்தனை என்பதால் கணக்கில் வந்தே தீரும். அதே போல் சில தனியார் பள்ளிகள், தொழிற்சாலைகள், கம்பெனிகள் போன்றவற்றில் ஊழியர்களுக்குக் கொடுக்கப்படும் சம்பளம் கூட இப்படித் தான் கொடுப்பது ஒன்று, அவர்கள் கணக்கில் காட்டப்படுவது ஒன்று என இருக்கும். இப்போது செக் மூலம் வங்கியில் சம்பளம் போட்டாக வேண்டும் என்பதால் இனி அப்படிச் செய்ய முடியாது.

அடுத்து குப்பன், சுப்பன் என அனைவரும் வங்கிக்கு வந்து வங்கிக் கணக்கு தொடங்கி அனைவரையும் பணத்தை வங்கியில் போட வைத்ததன் மூலம் எல்லோருடைய வருமானக் கணக்கும் அரசின் பார்வையில் வருமாறு செய்ததும் ஓர் வெற்றி என்றே கொள்ள வேண்டும்.  அதோடு ஏடிஎம்மில் 50 நாட்கள் ஆகியும் பணம் வரவில்லை என்பவர்களுக்கு 50 நாட்களில் நாட்டின் நிலைமை மாறும் என்று தான் சொன்னாரே தவிர, ஏடிஎம்களில் பணத்தை நிரப்புவதாகச் சொல்லவே இல்லை. இப்போது ஓரளவுக்கு எல்லோருமே கையில் பணம் இல்லாமல் பணப்பரிவர்த்தனை செய்யும்படி ஆகி விட்டது. ஆகவே இதுவும் இந்த அரசுக்குக் கிடைத்த வெற்றி என்றே கொள்ள வேண்டும்.  அதோடு இல்லாமல் மக்கள் வங்கியில் போட்ட தொகையில் மூன்றில் ஓர் பங்கு தான் இப்போது அரசு மக்களுக்குக் கொடுத்திருக்கிறது. ஆக அதிகம் புழங்கிய பணம் தேவைக்கு அதிகமாகச் செலவு செய்யப்பட்டதால் என்பதும் இந்தக் குறைந்த அளவு பணத்திலேயே நாட்டில் பணப்புழக்கம் சரியாக இருக்கிறது என்பதையும் இந்த அரசு புள்ளி விபரங்களோடு எடுத்துக் காட்டி இருக்கிறது.

ஆகவே நாடு முன்னேற்றத்தை நோக்கிப் போய்க் கொண்டிருக்கிறது. ஏடிஎம்களில் பணம் கிடைக்கவில்லை என்று சொல்வதால் எந்த வேலை நின்று போயிருக்கிறது? எல்லோரும் அவரவர் வேலையைக் கவனித்துக் கொண்டு தான் இருக்கிறோம். ஆகவே குற்றம் குறை சொல்லாமல் ரூபாய் நோட்டுக்களின் மதிப்பைக் குறைத்ததன் நல்ல நோக்கத்தைப் புரிந்து கொள்வோம்.

நண்பர்கள் அனைவருக்கும் இனிய புத்தாண்டு நல் வாழ்த்துகள்.